PONNJE: Marsache 21ver, sokallchea 2 vaztam poriavoronn montri Xri Matanhy Saldanha kallzacho atak zaun Ponnje eka khasgi hospitolant ontorlo. Uprant tachi kudd Goem Voizuki Kolejiche hospitolant haddli. Mornna vellar tachi pirai 64 vorsam asli. Halinch zal'lea Vidhan Sobhechea eleisanvant Matanhy BJP pokxacher Kutt'ttale motdarsonghant bhovmotan nivddun ailolo.
Tea uprant Marsache 6ver tannem montriponnacho soput ghetlo. Elisanvamchea kaim dis adim Xri.Saldanha BJP pokxant bhitor sorlolo. Tachea mornnachi khobor aikun Mukhel Montri Manohar Parrikar GMC-nt bhett diunk gelo. 2002 vorsa Xri. Saldanha, United Goans Democratic pokxant jikhon ailolo. Tea uprant, Parrikaran taka montrimonddollant zago dil'lo.
1980 vorsa Xri. Saldanha ramponkaranche hok'k mellon diunk vaurla. Toxench National Fishworkers' Forum( NFF) ghoddun haddun, Goenchea 'economic zone'-a virodh to zhuzlo. Mornnachea panch dis adim tannem Mukhel Montreak bhett diun nustem marunk bondi aslolo kall vaddouncho mhonn tannem maglolem. Sod'deak Goeant Julhai 31 meren nustem marunk bondi asa. Hache adim Agost 15 meren Goeant nustem marunk bondi asli, punn Kongres sorkaran to kall 31 Julai kel'lo, oxem tannem Mukhel Montreak sanglolem. – V.Ixttachea Upkaran
0 comments:
Post a Comment