Saturday 16 July 2011

Chandneacheo Rati – Boroupi Freddy Agnelo Fernandes, Dubai

Omasacheo khalki rati zavn khobar
Sobit-sundor chondr dislo mollbar
Loklokit rupnnem haddlem tem uzvaddar
Hea sobit disnnean asa kai dislom hanv sorgar

Somdirant dekhlim kirnam khelltat tim lharar
Dongra borobor maddachi-i savli halta ti udkar
Nistem pasun udkeo marun utthlem khellar
Chondran dekhlo astolo udkar aplo sobit rupkar

Dhekli savlli madda-chuttanchi khellta ti kosar
Mollbar diso dhanvtim dovim kupam sabar
Ontrolar noketracho titlo disonaslo fankar
Ghol-ghol chondracho nazuk diso akkar

Chandneacho uzvaddan bhorlo purai sonvsarar
Khalokachi bhirant pasun nanch zavn geli varear
Vatsuro legun chuli-bogor choltalo pad rostear
Chondracho xitoll prokasak sontosta soglo sonvsar

Prokaxit purnimacheo rati ietat tis disank don pavttim
Kitko uzvadd fankarta purai sonvsara bonvtim
Umedin kuxallkaien ulastat burghim toxim zanttim
Chandneache uzvaddak kallza-mona dhadoxi sogleanchim

Mogkornarani chadneachi rat sarun sangatan
Vengent ravun bhettovni keli hat dorun hatan
Doganui bas dili visvaxi ravunk moro porian
Chandnea baxen mogkormarani jivit sarchem mogan

0 comments:

Post a Comment