KUDTTALENT ADLEA CHORANK NIVDDUN ADDCHE NHOIM – Bor: Menino Fernandes

Kudttale zaunchem asa tem motdan borench zorant prochar cholta. Eke vatten asa bai Alina Saldanha potin sorgest Matanhy Saldanachi ji aplea potichea hetuni cholpachi tor dusre vatten asat adle Goenche porjen nakarlele ani bhair marlele broxttachari rajkarbari. Tor Kudttalechea lokan konnank vinchun kaddunchem?

Kaim zann Mopa hea vimantollachea nanvan atam upzoleat fokot aplea faideak ani aplim bolsam borunk. Tantle zaun asa dog maha broxttacheari Anacleto Viegas ani Radharao Gracias UGDP hea pokxeache mukheli. Tosoch hea dogainim veddo ghala Churchill Alemao-nk zannem eka kallar Mopa add lokak uskaun margar addun uprant ghat ghetlolo aka. He soglle soitan adam ube zaleat apli loz dampunk vavurtat. He atam lojek podleat porjen tankam bhair marle mhunnon. Te koxei toren nivddun eupacho proitn korit asat. Punn Kotta!

Churchill Alemao-an fattle vechnnukechea vellar spoxtt kelelem ki zorui tor apunn Navelim motdar songhant harlo zalear apunn anik hea fuddem rajniting kedinch raucho nam mhunnon. Tor ho sodanch utrar add vochpi lobadd ani broxttacheari Churchill kiteak tollmollta portun rajnitint bhitor rig gheunk? Oi taka bhirant asa mukhel montri Parrikar tache add paul martolo mhunnon. Bhirant asa apunn koidikhanneant poddtolo mhunnon. Bhirant asa apunn lojek sampodtolo mhunnon.

Dusre vatten chouxilean nodor marun pollelear ani barik chintun pollelear oxem disun eta ki Manohar Parrikarak pationcho nhoi mhunn. Kiteak? Parrikar sodeak aplea soglea basaunneacher soddun petrol add ghelolo asa. Tannem broxttachearak kosloch tenko aschonam mhunn prochar kelolo to tannem poilo moddlo. Dusro tannem casino Goenchea doriantle bhair kaddtolo mhunnon basaunni dileli punn mukhel montri zatoch sogllem portem kelem. Tannem casinochi fee denvoili jea vorvim casino anik borech nettan cholonk laglea.

Tisrem okosmat Parrikar sarko ful’lo ani Mopa vimantoll zata titlea veguim bandtolo mhunnon nirnnoi ghetlo Goenchea lokachem mot ghenastanam.

Parrikaran mat punn chintunk nam ki bharotachi doria fouz zopon asa ti Dabolim aplea tabeant korun thoinche Goenkarank bhair uddounk. Ani hem oxem ek dis zatelench jerul zor tor Mopa vimantoll bandit zalear. Mukhel montri kitliim axvasonnam dilim passun zalear bharotachi doria fouz Dabolim koxich aplea tabeant ghetlea bogor soddchinam. Tanche laguim Pordhon Montri uloum ou raxttrapoti uloum Dabolim gheleleantuch asa.

Hea passot barik chintlear BJP-cho anik amdar ascho nhoi oxem dista ani chodd xe Goenkar hench uloitat. Tor bai Alina ekdomuch vankdde ghaddient bosli ani tinnem toxench tichea ghorkaran dhormvaddi pokxeak aplo tenko diun tantun bhitor sorlim. Henvui zaupak guneanvkari zaun asa UGDP zannim sorgest Matanhy laguim khell kelo ani aplim bolsam bhorunk taka khub tras kele ani heach passot Matanhy BJPint guslo.

Tor Kudtallechea Goenkarano tumi atam chintun tumchem mot ghalat. Amkam fokot ek vimantoll puro amchem Goem ekdom lhan asa ani don vimatollanchi kainch goroz nam.