DOLLE ASSON KURDE ZAI NAKAT boroupi Menino Fernandes

Ami Goenkar dolle asson kurdde zaleat. Ami polletat koxi porim amche voddil ou ami vinchun kadlele amdar amkam fottoitat te. Itlem amchea dolleam mukhar zata astana ami dolle damptat ani teach bamteam borobor bountat.

Fatlea disani ami pollelem koxe porim Nadia Torrado-n atmoghath kelo to. Koslem pozddeponnachem jivit tem jielem tem ugddapem zaun ailem. Tacho addecho mogi amcho purvilo Tourism montri Mickky Pacheco aple zut’te velo sokol poddlo to. Mickky itlem pozddeponnachem jivit jielo and jieta, sogllem potrancher and chitrancher ami Goenkarani pollelam. Torui astana kaim Betalbatimche lok taka aplo tenko ditat anikui vankddem jivit jieunk. Todde zann kaim poixeank lagon hem kortat tor thodde zann apnnak irlemxem kopachem mellonk zai mhunn kortat. Tor kitem chintlam zait ami Goenkarani? Sodanch oslea bamtteank ani bodmasank rajnitint nivddun addunk? Atam tori ami ginean gheun borea munxeank rajniting nivddun addunk zai. Poixe aiz dita te faleam kobar zatat hem ami chintunk zai. Thoddeach poixeank lagon amcho otmo, amchem ontoskornn rajkarbareank ou amdarank vikchem nhoi. Ami Goenkarani zababdari gheun bore fuddari nivddun addunk zai zor tor amkam amchea bhurgeancho fuddar boro zalolo zai zalear oslea pozoddponnan jietelea umedvarank nakarunk zai ani bore ani xinklele umedvar nivddun addunk zai.

Dusre vatten Fondechean nodor marlear amkam disun eta koxe porim Roy Naik, put Ravi Naik, Ghor Montreacho, noxeachea vokdancho dondo korun Goenchem ani Goenkaranchem naum ogddaita. Tachea bapaiche codelicho to faido kaddta. Ani velean zalear Ravi Naik taka tenko dita. Ami barik chintunk zai oslea munxeank amchem molladik mot ghalchea adim amcho fuddar kitem zatolo to. Oslea munxeank nivddun addlear Goem anikui bigddon vetelem. Goenkarano chintat ani dolle ugte korun polleiat. Osle umedvar ou amdar amkam kiteak zai?

Saxttichea mollar anik ek vadoll upraslam. Tem mhollear RAHEJA ani he vadoll konnem uprasailam? Amchem Navelimchea amdaran ani PWD khateachea Montrean Churchill Alemao hannem. Atam Churchill aple dhuvek Valankak, jem zaun assa ek vokil, taka rajnithichea molar addta. Assa kai lokak khatri Valankachi. Valanka zorui ek vokil ou advogado torui taka irloi onubhov nam rajniticho. Rajkaronn kednach cholounk nam tem Valanka tandunk xekot hem zabadarechem voddem? Maka zalear disona ki Valanka Goenkarank borem rajkaronn diit xem. Punn assa kai amchea motdaranche dolle ugte? Chint Goenkara tujem moladik mot ghalchea adim chint ani polle.

Goenkara chint ani polle. Tujem moladik mot vikum naka. Goenkara hea olkhea umedvarancho tum gulam zai naka. Nodor marun polle ami Goenkar disan dis unne zatat. Nhoi ami pordesant vetat mhunn, nhoi ami nokrek veta mhunn punn he amche montri ani amdar ou vechnnukek boslele umedvar bhailea munxeank addun Goeant bhortat apnnak motam mevonk. Tankam amchem Goenkaranchem podlelem nam. Te chint’tat fokot aplem ani aplim bolsam borpachem. Churchill, Mickky, Ravi ou dusre her montri ani amdar soglle ekach rukachim follam. Te fokot chorunk ani luttunk urlet. Goeancho sot’teanas korun soddlo hea sogllea chorani. FUDDLEM SOGLLEM TUMCHEA ATHANI ASSA………..