Ponnje: Xant ani susegad Gõy mhonn ji fank Gõyam vixim sonvsar bhor fankarlea ti aste-aste nopoit zait veta. Gõyant khun borech vaddunk lagleat. Hea vorsachea Janer tem Junh 15 meren veg-vegllea zageamni 26 khun zaleat mhonn Gõychea pulis khateantlean gomlam. Hacher niyontronn dovrina zalear fuddarak Gõykarank borench marekar zatolem.
Atam meren je 26 khun zaleat tantunt Kalangutt chodd khun zaleat. Hangachea pulis sthanacher fattlea sadde panch mhoineank 4 khunnachi nond zalea. Tache fattlean Kolva, Ponnje ani Fonddem hangachea pulis sthanacher 3-3 khun zaleat mhonn nond zalam. Tachea uprant Verna, Mhapxea ani Kunkolle hea dor ganvant don khun zaleat. Maina, Kuddtore, Agxe, Divchole, Moddganv, Kollem ani Anjuna dor ek ganvant ek-ek khun zala.Gõyche pulisechea mukhel khateant mahiti dil'lea pormannem 2009 vorsa fokot sov mhoineam bhitor 26 khunn zal'le mhonn gomlam. Teach porim sadde panch mhoinneachea kallant khunn korpache 12 proitn zaleat oxem pulis xetramni sanglam. Hea vaddtea khunachea ankddea velean ek gozal spoxtt zata ti mhonnelar Gõyant guneanvkareancher pulisecho kosloch tabo naslolean khun, chorio, bolatkar, ani her sabar toreche guneanv vaddleat.
Gõychi bodolti poristhiti ani vaddti lok-sonkhea pollelear hangasor kaido ani surokxechi vevostha borich oskot asa oxem somajik vavurpinn Xmt. Auda Viegas-an potrkarank sanglem. Zo meren Gõyant Gõy bhaile yevpeancher koddok niyontronn dovorche nant to meren hem oxench cholot ravtolem, oxem Xmt. Viegas mhonnta. Je 26 khun zaleat tantutn 15 khun Gõy bhaileanche zaleat. Ani 11 khunn sthanik lokache zaleat oxem tea-tea pulis thanacher nond zalam. He 26 khunamni morunk pavleat tantunt 22 dadle, 3 bailo ani eka lhan bhurgeacho aspav asa.
Itle sogott khun ghoddpa fattlean mukhel karanna mhonnlear soreachi noxea, ostoreachi bhuk ani haka lagun zalolim kestanvam, zacho xevott khunn korun zatat, oxem Kalangutt pulis thaneacho pulis nirikxok (PI) Manjunath Dessain sanglem. PI Dessai sangta tea pormannem je 4 khun zaleat tancho ekuch khunn adi kelole yevzonne (Pre-planned) pormannem kela. Her tin khun soreachea noxen ani xindullke khatir zaleat oxem to mhonnta. Kolva pulis sthanacho PI Tushar Vernekar sangta je 3 khun zaleat tantun te Gõy bhaileanche. He khun soreak lagun zaleat tantlo ek soro piyeun tras korta mhonn bailenuch aplea ghovak marlo.
Hea 26 khuna modem 3 khunn he ostoreanche zaleat. Tantutn sod'deak gazta tem khun prokoronn Xmt. Suvarnna Naik hicho asa. Tika dotik lagun tichea ghovanuch jivexim marli. Teach porim dusre eke dotiche kexitn Ganpat Shetye-n aple bail Sweta Shetye-k hicho jiv ghetlo. Tisrea kexint eka tornattean aplea mogeak jivexim marlem. Tachi pulis atam chovkoxi korta. Hea khuna modem dogam bailamni aplea ghovank jivexim marle. Hantunt Divcholent Basu Motecho Babita Gawde-n kelo. Dusro khun Mayache 31ver Majorda zalo. Relve pulis Pramod Prasadachea khunachea aropa khal tachi bail Ruby hika tabeant ghetlea mhonn pulis sutramni xevottak sanglem.
3 comments:
te souvisui khunn apne keleat mhunn konn tori ek Mahanand(part II) polisank jerul mevtolo
Ani taka Kortint vortoch, apnnem te korunkuch nam ani apunn tankam voukochnam mhunttolo. Ho amcho Goencho estad zala aiz-kal.
hey dlp, nice to see ya on the konkanni page mannnn
Post a Comment