Vorsachea vorsa Mayachi 30 tarik 'Statehood Day' mhunn monoita. Hachem karonn mhunnlear Purtugezanchea chopkeantlem 1961 vorsant mukt zal'lea Gõyank Mayache 30 tarker, 1987 vorsa vegllea rajyacho dorzo mell'lo. Gõykarank ho dis khub mhotvacho asa kiteak Gõy vegllem rajyo zalea uprantuch Gõychi asmitay sugur urpachi ani Gõykarponn sasnnak jivem urpachi as vaddli ani choddli.
Songh Prodesh: Gõy vegllem rajyo zanvche poilim Bharotacho ek Songh Pradesh vo 'Union Territory' mhunn zogtalo. Songh Pradesh mhunnlear zor Gõyank porjen nivoddlolo sorkar aslo torui Gõychim sogllim sutram Delhiche fuddari choloitale. Kosloch vavr vo koslich yevzonn vevharant ghalunk Kendr Sorkarachi porvangi zai asli. Kendr sorkarache porvange xivay Gõyant ek kaddi halonasli mhunnlear fott zanvchina.
Vegllem Rajyo: Gõy vegllem Rajyo zalea uprant amchea fuddarache aminch dhoni zale, aminch amcho fuddar ghoddpi zale. Porjen nivoddlolea sorkarak kosloy vavr vo kosli yevzonn vevharan ghalpak Kendr sorkaran nhoi, punn amcheach sorkaran maniotay diun fuddem vochunk sovlot mell'li. Ami nivddun kaddlolea fuddareamni amchea fuddara vhoir nirnnoy ghevop ani to vevharan ghalop hem soimbik asa. Itlench nhoi nirnnoy ghevpi fuddari khud Gõykar aslolea karonnan tankam Gõyche porjechi odik bori mahiti asta ani tanche nirnnoy choddan chodd Gõykaranchea faideache asunk sompeponn zata. Anik tin disamni ami 'Statehood Day' somarombhtole mhunnttoch tacher matso niyall korum-ya.
Poilo proxn: Gõy vegllem rajyo zaun Mayache 30 tarker 24 vorsam bhortolim. Hea 24 vorsam bhitor ami kitem melloilam kai? Hea prosnnak zobab mhunnlear Gõycho onek vattamni vikas zala hantun matui dubhav na. Xikxon ani udeog mottea promannan posorla. Roste, bizli, udok Gõychea konxea konxeak pavlea mhunnlear fott zanvchina. Khell ani sonskrutik mollarui boro upeogacho vavr zala, adi. adi.
Dusro proxn: Tech porim hea 24 vorsam modem ami kitem ogddailam kai? Gõykaram modlo adlea kallailo ekvott aiz disona. Zativad, dhormvad apleo tokleo vhoir kaddta tem polleun dukh bhogta. Bhroxttachar itlo vaddla ki hem duxtt amchea jivitacho bhag zata oxem disunk laglam. Somazant vesnnam (vices) vadott ani choddot asa zalear mul'leam (values) disandis nas zait veta. Gõyantlem rajki jivit sarkench sokoilea panvddear pavlam mhunnlear fott nhoi.
Svarth: Amchem Gõy ek lhan prodesh aslolea karonnan tachi bhes bori udorgot korum yetali punn toxem ghoddonkna kiteak amchea rajki fuddareank Gõyche udorgoti poros svothache udorgoticho odik husko asa. Amche fuddari poilem aplea boreaponnachem chinta. Tankam Gõychem boreponn svothachea boreponna poros mhotvachem nhoi. Ap-aplo svarth Gõyam poros odik mhotvacho. Ani heach karonnank lagun fattlea 24 vorsank Gõychi zoxe porim udorgot zaunk zai asli toxi zaunk na.
Sompoitana: Gõychi oxi doxa zaupak Gõychi porza-i taka zababdari zaun asat. Zori tor tannim borea ani promannik mon'xank nivddun dil'le zalear amchea Gõycho aiz soddsoddit vikas zatolo aslo. Amchi porja aplem mot ditana Gõychem boreponn dolleam somor dovrun mot dina punn svothachem boreponn chintun mot dita. Zo poriant Gõyche motdar apli zababdari somzun yog'gia mon'xankuch nivddun haddchena to poriant bhroxtt fuddari venchnnuko jiktoch ravtole. Ani zo poriant bhroxtt fuddari raj kortole to poriant Gõycho ukol zaunk pavchona. Heach khatir May 30 tarik monoitolea 'Statehood Day' hea dobajeak orth urla kai?
5 comments:
kagtar poilear ghotok raj... assemlint poilear natok raj
Sarkem sanglem re puta mojea. Tevui zalea atam tiatrist. Amche tiatrist don dis tankam tastat ani uprant tankam mukhi soire koxe aplea tiatrank apoitat. Anspachi Gozal hi
Maka khup koxi bogli amcho itlo famad Tiatrist, Tomazinho Bab, Niz Goenkaracher boroup korta tem.
Alu Titiu, tunvem kitem boroilam tem sarkem soth. Todde Tiatrist bailea ganvant vetat ani amcheam politician chorank tastat. Goeam guele mhunttoch tanchea bonkan lott'tat.
CD KADTANNAM EK HOZAR CD MINSTER GHETA APNNAK "CHIEF GUEST" APPOILO MHUNN.
TIATR BOROUPINACHI KONKANNI AIKOLEAR RODCHEM KAI HANSCHEM TEM GOMONAM. POCHPOCHIT KONAKNNI VAPRUN TIATR BOROITAT ANI TIATRISTANICH KONKANNI SAMBAL'LEA MHUNN HORAM GAITAT.
Ugdass Konkani bhasachoZalim votra vorsam, Konkani bhas amchi zalearraj bhas,Kitleo pilgeo somplio avoi bhas zaun asa Konkani.Goenche ami putt Konkani bhaxea amchem rup,Fuim ami asum zaum Goem vo bair,Goenkar mudon pacharunk zata focot uloilear amiKonkani.Borounk eta koxe lipin romani vo devnagrinpunn lozo nakat ulouvonk ti avoi bhas amchi konkani.Xinkonk eta zaiteo baxeo punn visronakai xinkonkburgeank amchi bhas Konkani.Jerson VazU.A.E.
Post a Comment