Bhaxe voir zaiti bhasabhas ani niyall korun xekim Gõychea Kongres sorkaran Inglez madeomachea mullavea iskolankui sorkari onudhan vo grant divpak tharailem. Ho nirnnoy ghetana iskolamni 1-10 meren Konknni vo Marathi bhas xikunk 'Compulsory' vixoy xikovpachem kelam. Ho nirnnoy sarko ani itihasik Gõyant Konknnicho ani Maratticho vistar korunk. Jednam Maharaxttrvadi Gomantak Pokxa khal Marathivale Gõyant sodrer asle tednam Marathi khatir tannim kitench kelem na.
Konknniche devnogrivaleancho pongddan iskolamni Konknni vistarunk kainch kelem na. He donui pongodd eka mekak dekho-xoko nasle te atam Bharotya Bhaxa Surokxa Manchachea asrea khal ek zaleat. Ani Kongres sorkaran ghetlolea nirnnoya vorvim Konknnichem ani Marattichem padd ghaltole ani ganvchi sonvskrutay ani Gõychi asmitay ibaddtole mhonn manngeachim dukham golloitat. Hech dexi sonvkrutayechi mogi ani samballnar je Inglez iskolank onudhan diunk nakartat tech aplea natrank olpsonkhechea Inglez madeomachea iskolamni ghalun poile fuddem sortole. Titlench nhoi sorkari onudhan gheun tech novim Inglez madeomachim mullavim iskolam ugoddtolet.
1975 vorsa Marathivale ragan bhoron Konknni bhas Morattichi pott-bhas mhonn perganv ghaltale. Konknni svotontr sahityik bhas mhonn maneo korina zaunk khor virod kortale. Delhichea Sahitya Akademin 1975 vorsa nirnnoy ghetlo. Konknni Gõychi Raj bhas zatali tednaim tannim virod kelo. Ani guspagondoll korun 1987 vorsa Gõy, Daman Div Odhikrut Bhasechea Kaideant koxe toren Marathik bhitor kaddunk tanchi yevzonn zali.
Konknniche devnagrivale eksarke naddbudhiche ani chotur. Tannim olpsonkhechea lokak fuslailo devnagri lipi mullavea iskolamni xikovnk magnnuk lailem. 1990-91 vorsa Konknni fuddareamni Konknni khatir kainch kelem na, apleach iskolamni Konknni vixoy koso kelona. Ponn sorkar sorkari iskolamni Marathi bhitor kaddtalo tedna tannim dolle dample. Choddxea lokan mullavea iskolamni Marathi ani Inglez bhitor kaddli. Tannim sodanch Marathik trump kard koxem vapurlam ani olpsonkheank Marathi add bhirantichem mon rigoilam.
1986 vorsa bhaxechi chollvolle vellar te jikle olpsonkhechea fuddareank KPA hantun Romi lipiche Konknnik Gõychea Odhikrut Bhaxechea Billant bhitor ghalina zaunk. Tednam Gõy Maharaxttrant vilin zavpacho dubhav aslo.
Jednam Bhas Kaideant Marathik xinvachea vanttea poros odik dilem tednam tannim oge ravun olpsonkhechea lokak fottoilo. Zor te promannik asle zalear Bhas Kaideak virod kortole asle, te bodlek tannim olpsonkhechea fuddareank thondd dovorle. Konknnich khatir te kiteak zhuzle nant. Hacho zabab nivoll asa. Te zanno asle, chodd lok Konknni uloitat tori boroil'li Konknni mandun gheunche nant mhonn zanno asle.
Chodd lok dhormik, somajik, sonskrutik mollar Marathi vapurtat, amontronnam Marathin chhaptat. Ekuch disallem Konknni cholta tem udeogpoti duddvancho adar dita. Tea xivai Gõyant 10 Marathi disallim khoptat.
Konknni devnagri lipi bhovsonkhechea somudayan nakarlea. Fokot sorkaran Goa Konknni Akademik onudhan dilam mhonn ticho vistar zala. Devnagri Konknnint Marathi utram bhorxileant ani tichea pustokancher khup veakronni chuki asat. Zaiteo 'spelling' chukeo asat ani orombik ani novem tantunt kainch na. Nagri lipichi Konknni xikchea poros Marathich xiklear odik borem-xem dista.
Inglez madeomachea iskolamni don boreo sondheo asat; teo mhonnlear Konknni na tor Marathi xikum yeta. "Forum for the Rights of Children's Education' ani her lok je Inglez madeoma khatir zhuztat tankam Romi lipi iskolamni magtat tankam zhuzumni.
Bharotache Ghottnne pormannem olpsonkhechea iskolank tanche bhaxecho ani lipicho vistar korunk hok'k asa. Mhonntoch olpsonkhechea hok'kam khal tancheanui 1li tem 13vi meren Romi lipin Konknni xikovpak magum yeta. Hi ekuch vatt tanchi Konknni samballunk ani vistarunk. Na zalear xikpi devnagri lipinuch Konknni xiktolim, ji meloli ani naka zal'li bhas.
0 comments:
Post a Comment