Mundkarani Vanxim vikunk proitn kele? - Boroupi Bosco de Sousa Eremita

Ponnje: Gõyche Arkidiosezin dil'lem nivedon sotachem asa tori Vanxechea kaim munddkaramni aplea tabeant asleli zomin bildderank vikunk rattavolleo keleot . Arkidiosezichea 'website'-ir Arkidiosezin dil'lea nivedona pormannem, vompinaslolea xetanchi zomin bilderank vikpachi bondabost choltali mhonn ugddapem kelam.

Santa Monicachea konventacho samball korpachea khorsak lagun Igorjechea odhikareamni hi zomin odik duddu ditoleank vikunk fuddem sorchem poddlem. Haka lagun Vanxim zunvear ravtolo lok, Arkidiosezik guneanvkari kortat karonn hottel-karank ani bildderank zomin ani Vanxim-cho sogllo zunvo vikunk kaddla mhonn. Punn Igorjecho khulaso sangta tea pormannem hea zunveacho fokot ek vantto vikla mhonn gomlam. Khoreponnim, Igorje bhonvtonnim asloli 99,192 chovkonn metram zomnicher lok ravta; hi soglli zomin Arkidiosezik lagu zata. Onek khobre pormannem 3,00,275 chovkonn metranchi zomin xetam asloli; ti munddka-reanchea tabeant asa. Ponn him munddkaram zunvea bhair dusrea ganvant ravtat. Sumar 15 vorsam odik zalim tim xetam vompinant. 1996 vorsa kaim munddkareamni, Munddkar Kaideacho faido ghevn dor chovkonn metrachem mol fokot 36 poixeamni ixeob korun zomin gheupache duddu deposit korun dovorleat. Punn hi zomin gopchup bildderank vikpacheo munddkaram rattavolleo kortat mhonn kollun ailam, oxem tea nivedonan mhonnlam.

Vanxechi zomin vikpak thoinchea Munddkaranche Songhottnnen koslich horkot na mhonn sangun Arkidiosezik promann kelam. Tea bhair 1,85,125 chovkonn metram zomin munddkar nasloli mekli asa. 1992 vorsa, hi zominn vikti ghevpa khatir khupxe prostav ailole. Survatek hi zominn vikpachem Arkidiosezichea odhikareamni chintunk naslem. Punn uprant borim giraikam yeunk lagtoch ani hangache munddkareamni tim xetam vompinastana soddlea tem polleun Arkidiosezichea somitim kodde Igorjechea kaidea pormannem bhasabhas keli. Ani tancho sol'lo ghevnuch ti zomin vikunk tharailem. - VI