PONNJE: Kall bodolta toso somaz bodolta. Ani amcheo chali-riti somptat vo dusro akar ghetat.
Halinche vorsamni amchi sonskrutai bodlot asa. Karnaval bodol'lo ani mornnache tonnir pavla, ponn San Juanv utsov amchea kaim ganvamni ozun jivo asa, oxem mhonnlear fott zaunchi na. Goyant San Juanvche porbechi porompora khub girest ani soglleam Goykarank trupt korta. Tea karannank lagon ti porompora ozun tigun urlea.
Halinchea vorsamni Karnavalant khup burxeponn riglem. Lokancho Karnaval aslo to aste-aste dhondekarancho zaunk pavla. Goykaram modhem khori mouz asli ti nopoit zali ani te suvater 'floats' dekhave bhitor sorle. Tea utsovant bhag gheunk lokamni ang kaddlem ani Goyche Igorz Matekui tem mandonk nam.
Ponn San Juanvachi porob dobajean monounk Goykar fattim ravle nant ani te somorombhnnek kaim boreo chali-riti sambhallun dovorleo. C Alvares ani tachea sangatean San Juanv dobazo aplea kantaran zoso lovkik kela, toxem hea disa torekvar kariavolli ghoddun haddtat.
Soro pievn vo pienastana pasun baint uddki marpak ek sonkottachi gozal. Hem donui gozali soddleo zalear, bakichi porompora khub girest asa. Novim zoddpim aplea ganvant soglleank follam vannttat. Manvoddea thaun zanvoiank sagvad dhaddtat.
Patolleo ani her torechim khannam toear kortat. Kaim ganvamni, khas korun Kandolle, Raibondra ani Baga sangodd vo voddim zhoddun nodint kariavolli zatat. Siole ganvkar voddim sobit nhesoitat ani tantunt bosun nodintlean mukhel kariavoll zaunchi asa tea zagear vetat. Bhurgim toxim zannttim sobit kopelamni ghalun akorxit distat. Thoddea ganvamni dusre prokaracheo karyavolli zatat teo soglleank khobor nam.
Tori ponn, he porbechem svarup bodlot asa. Eke vatten hotelamni taka dhondevaik rup dilam, dusre vatten kaim bodol zaleat.
Kaim zagrut nagrikamni poriavoronnachem mhotv ani her somajik vixoy lokam mukhar manddpacho kela ani korit asa. Gel'lea vorsa Salvador do Mundo ganvchea ani bhonvtonnchea lokamni 'Soro Naka' hachea barabor 'Plastic Naka', oso sondex toktteamni ani karyavollintlean lokam mukhar dovorlo.
Jiv sonkoxttant ghalun, baint uddki marpachi sonvoim bond korpak-ui tannim avaz utthoilo. Ponn sogleamni bhienastana mouz korunk zata tosleam khellancher tannim bhor dilo. Katolleo vo dolle bandun narl foddop ani osle dusre khell ghoddun haddle. Lokank kottiamni pez ani kellim panacher jevonn vanttlem. Tancho sondex oso aslo: Poriavoronnak mar ditat tosleo vostu vapurcheo nhoim.
Hea vorsa, xezarchea Pomburpa ganvant Aitaradis, Jun 26 tarkher, udkachem mhotv tech somorombhnnek lokanche nodrek haddtole. Karyavollicho vixoi oso astolo: "Soglle thembe gorjeche'. Udok addaun tem samballpak ani favo te bhaxen vapurak tea kariavollint proitn zat'le. Fuddlim zhuzam udkacher attapun astolim. "Tea pasot, amche zhori vhanvun ibadd zatat, tancho pievpak upeog korcho. Ho sondex Pomburpa zhori kodde zavpi kariavollint ami lokam fuddem dovortole," ek ganvkaran sanglem.
Kaim ganvamni az Goem ani jog hirvem dovorpak kaim zannamni toktteancher ani T shirts-ancher sondex manddlo. Pedd, Bannavle kariavollik hajir zal'leank kochro ubharpak tin veglleo potieo dovril'leo. Hangache ganvkaramni konnak rostear kochro uddounk dinant. Hea dobajea vhoir ek igorjecho vhoddil aplem mon ugddunk toyar naslo. Ponn ek padri mhonnta ki soro pievn jiv ogddavpa sarkil'le khell bond kelear borem ani sonskrutik nodren bore te apnnavche. "Udok vapurtat te baint uddki marun ollxik korpachem bond korchem," to padri mhonnta.
Thoddkeant, San Juanvachi porob khub poromporik ani torekvar ani ti jivi uronk ast balgum-ia.
3 comments:
Amcho Goencho Sao Joao korop mhunttlear sarkoch vegllo. Mateak fulanchim ani valinchim ou krotanachim kopelam ghalun baint uddki marpachi. Hem amchem ami azun chalu dovorlam, punn amchea atanchea bhurgeank ami xiddkaunni divunk zai hi amchea purvozanchi porob sodanch chalu dovorpak.
C Alvares-achem kantar ahkea Goent he itlem disa gazta. " Chol re pie re tum ilo ghe re ...." kim konnuch sot mancho mancho nam C Alvares ken'nach soro piunk nam montlear. inglezint ami montanv "teetotaller". Tachi macheivelli bhumika and jinn ekuch!! Tacho ugdass omor urom.
Xabaski tuka Paul Bab. Ho tuzo lekh anink ek pautt vachun maka khup amchea adlea burgeaponnacho ugddas evun, patolleancho bhi ugddas evun mojem pott borlem and denkor sudam ailo. Dev bioem korum tuka.
Post a Comment