Igorjen Vaittacher ani Bhroxttacharacher Nixed Marcho - Boroupi Freddy Agnelo Fernandes, Dubai

Poile suater, Vavraddenchea Ixxtan ho boro lekh porjechea mukhar dovorla ani tatunt zaitech sott asa. Adhunik kallar thaun tem aiz meren proje mukhar avhanam ani prosn choddot asat ani ami tim avhanamk ani prosnak zabab sodinam zallyar amchem kotta. Amche Igorzmattechem kam zaun asa, amchea attmik sudaropa borobor, somajikui tothvam ani boreponna pasot vaurunk.

Korem mhullyar, Bharotant ani bouv korun Goyant bhorxttachar ek orixt pidda ji somajik ani ganvche udorghoticea rostyar ek vhodd adkoll ani hea noxttcher zhuzunk amchoch nhuim pun Igorjecho-i kaido zaun asa.  Igorzmatta, adhunik kallar thaun aiz meren amkam xikhoit asa ami noxtacher nixet marcho mhunn zallyar, amchi Goychi Igorz oxem kityak korinam ? Amche zaite padri bhau bhroxttachari amdhar montreank aplo tenk’ko ditat hem Igorzmatechea nehmamcher add asa, titlemch nhuim “dhannak” (donation) lagon tanchi khriti ani tust pasun gaitat. Hem amcheya padrimkui and Igorzmattekui sobonam

Punn todde bore padri-i asat, ami subhagi amchea ganvant osle dog padri amkam mel’le. Amcher akkant ailo, tednam te poje mukhar ube ravun amche passot zhuzle, te vellar te morunk passun toyar asle.

Tanchea khaljidar ponna vorvim ami ekvottan zhuzle ani jikle-ai bi, ami amchea padrimchea sohokaran amchea ganvant min kadpacho proyotn nopoit kelo.  Oslyach eka kamak lagon amchya eka padrik Bismsaibachi xitkaunni podli punn tannem sanglem, hi porza Devan maka dilea ani te porjechem borremponn apli zababdari mhunnon. Attam amchea dogui padrinchi fatofat bodli kheli, hatunt kitem-ai tori “punn” asam. Amche he dogui padri amkam atmik uzvaddai diunk, toxemch amchea ani amchea ganvchea boreponna passot vavurle. Tankam dogaimkui mhojo pronnam ani salam.

Bhroxttachar vaddonk amchoch ghuneau, ami zanna zaun-nhuim teach vaitovya ani bhroxttachari mon’xank nivdun hadtanv. Ami bore bashen zannaum amche he amdhar montri fokot ekuch hetu gheun rajkarnant bitor

sorleat mhunn, ani to mhul’lyar, zata title vegin, zata titlo poixo ektaupacho. Je meren ami hem mandun ghenat te meren amchem kaimch borem zaumchem nam. Osle poristitint Igorzmatten porjek xitkavunk ani tankam nittayer haddun zata. Goyant tis tok’ke voir Kristanv asat ani Igrozmattek zai zalyar, hea sorkarachea bhroxttacharacher ani durea sanskrutik ani somajik vaittamcher toxemch dharmik veglocharacher ak’kond nixet marun porjek ek novi dixa divunk zata, amchi sogleamchi maghnnim ani vinnounni, Igorzmatte chea fuddareani hem khorchem.

Igorz ek dharmikuch sonvsta nhuim punn somajik ani sanskrutikui sonvsta zavunk zai, porjechem boreponn ani fuddar Igorzmattechi zababdari zavunk zai ani hakach lagun anchea poryavaran, vatavaran ani sixttichem mott ani mol lokak soroll sangchi ghoroz asa. Amchem zivit ani jinn heach vostumcher staplolem asa ani hacho add-osor fudarak poddcho nhuim mhunn attanch vavrunk ghoroz asa. Porjecho fuddar, Igorzmattecho fuddar ani takach lagun Igorzmattecho fuddarui heach vostumcher tarailolo asa taka lagun, porjek hea vostum voir xikounk Igorzmattecho kaido.

Igorjechi xettam battam choddxim Igorjecheam vhoddilamni gheunk nant, tim chodd xim Igorjechea kuttumbachea boreponna passot lokanni dhann kel’lim asat, taka lagon porjek kolloi nastanam padrinni vo Bisman tim vinkchim nhuim, hatunt porjechem mot ghorjechem. Him xettam bhattam samballpakui porjecho kaido, padri eke Igorjent saun dusre Igorjent vetolo, Igorjechim xettam bhattam thuimch urtolim. Goyant dudu chodd zallean, lok koxt korun sodinnam, kitlem-i marog zalem zallear dekun poixeamni vikttim ghetat punn sotta koxt korchim nant, hakach lagon amchi poxtick pikavollichi zommin ani xettam pallong asa. Hache voirui Igorzmatten porjek xitkaupachi ani xikoupachi ghoroz asa.

Xevottak, ami soglim amchea bhurgeank borreo teo vostu, borrem tem ikxon ani bori rit-rovis urben ani nettan xikoitau, kityak heo oglleo vostu bhurgeank borim mon’xam zaunk tenk’ko vo adhar ditat, ech porim, porja bori zaumche passot, attmik ani dharmik drixti angata, somajik ani sanskrutik totvamchem mol ani mott xikounk gorzmattecho kaido zaun asa, toxemch Goyant vostolea vaittacher ani hroxttachar nixet marunk zai. Goyant borem vostolem zallyar, Goyche ennar toxemch zannar porjechea ginyan’nar uzwad haddunk zai. Igorzmattechea ul’learuch hem soggot god’donk zata, Goyemchem borremponn, Goyche Igormattechem borreponn. Mog assum