'Dum Maaro Dum' hea hindi cholchitran uchamboll zal'lea Goykarank anik uchamboll korunk proytn kela. Uchamboll korunk sompem. Punn uchambollaye vorvim borem utpon'n korunk vo vaitt vostunchi safai korunk titlem sompem nhoi oso amchea monant vichar rokddoch yeta. Tori astana vaitt poisaunk ani borea totvanchem zoit mellounk amcho bhorvanso amkam dhir dita.
Dum Maaro Dum hea cholchitrant Goychi safai korunk poile suvater ek ACP Kamat odhikarachi goroz asa mhunn dakhoita. Punn ACP Kamatachea adlea jivitant nodor marlear to-i bhroxttacharacho gulam' aslo. Tanchea motorak obsoeg zata ani tanchi apurbayechi bail ani bhurgem morta tea vellar thaun tachea jivitant ek novsornni bhitor sorta. Hea novsornnechea nettan ACP Kamat vaitt nopoit kortana morunk pasun bhiyena.
Goychi safai korunk poile suvater oslea mon'xachi goroz asa. Novsornni zal'lea mon'xachi goroz. Hi novsornni mon'xachea jivitant zaite pavtti ACP Kamata porim yeta. Okosmat jivitant ek odruxtt yeta ani jivitachi dixa bodolta. Punn oslo vell yesor amchean ravum yeta? Zaiteanchea jivitant chintunk naslolem odruxtt ghoddtta. Tori astana tim aplem jivit ogeponnim jiyeunk nirnnoy ghetat. Somazache seve pasot vavrunk, vaitt somazantlem nitoll korunk ani aplim mon'xall totvam khatir jiv diunk toyar zaunk aiz Dum Maaro Dum oslem cholchitr amkam avhan dita.
Joki nanvacho ek Goykar hea cholchitran kolokar asa. Taka sogllo lok susegad Goykar mhunntat. Punn jea vellar to utthun Goy samballunk kitem tori korunk sodta te vellar pasun taka susegad ravunk xiddkayta. Osle poristhitint astana, to aplea ixttak salvar korunk aplea ixttancho ani dusreancho sohokar magunk lagta. Sohokar mellona mhunn to niraxi zainam punn khatren fuddlim panvlam marta. Taka sohokar mellta, tachea adlea girlfriendacho ani tachi bore budhicho. Kosli bori budh? Ek devosanv - dovim fulam bhagivont Antonik bhettoit zalear, tuka magta ti vost tum chintina tosle suvater mellta. Ani sogllem sompaddlem koxem Jokik dislem tea vellar, tannem dovea fulachi bhett keli tem hea cholchitrant daikoita. Ani cholchitrachea xevottak yesvont zata.
Goychi safai korun dusre suvater amkam oslea sadea Goykarachi goroz asa oxem hem cholchitr khunnaita. Aplea ixttachea mogak vo Gُychea mogak lagun, aplim totvam soddun diun raji zaina tosleach Goykaran, Goychi safai korunk zata. Totvam sovay zaleant ani Devak zago na oslem jivit jiyelear, Goyant aslolea vaittachi safay zatoli?
Dum Maaro Dum hem cholchitr novvsornnechea nettan suru zata tem magnneachea bollan sompta. Totvancho itihas novsornni ani magnnem nastana borounk zainam. Dor ek totv bhov fikirin samballunk sodanch goroz. Hea totvanchi topasnni jerul zata. Totvam soddun ditanv vo tim omor urunk ami jiv diunk toyar zatanv tacher Goycho fuddar bandlolo asa. Vikhallim vokhtam, bhroxttachar ani mostem jivit Goykarponn khunnaita koxem dista tea mon'xan Goykarponn azun polleunk na. Zo monis tem chakta, to tem samballunk aplo jiv diunk ani totvam samballunk toyar zata. Hoch monis Goychi safai kortolo.
0 comments:
Post a Comment