PONNJE: Goenchi safai korunk zaite pavtti Goem bhailo lok vavurta. Punn Goenkarancho sohokar mellona zalear tem kam' purem zaunchem na, hem DUM MAARO DUM cholchitr xenn koxem susegad Goenkaranchea tonddar marta. Hea cholchitrant ACP Vishnu Kamath (Abhishek Bachchan) Goeant aslole drugs mafaichi safai korunk apoita.
ACP Kamath suru kel'lo vavr Goenchea ani aplea ixttachea suttke pasot Joki sompoita. Kiteak ACP Kamath-ak guneanvkar soddlolea uprant, tachea add govay diunchea poilim tacho khun zata.
Goenchi safai korunk ACP Kamath sufoll zait yeta tea vellar tacher morn yeta. Goeant vait vostu asat tanchi safay korunk zaito Goeam bhailo lok vavr korta. Ho vavr chodd mhotvacho. Punn Tanchea vavrak ani amchea Goenchea mogachem zoit zatolem zalear Goenkaram viret tem zaunchem na hench hem cholchitr govai dita.
Aple bhonvtonnim zata tem polleun susegad Joki chotur zaun hem cholchitr yesvontponnim sompoita. Ek vost tokhnay korpachi mhunnlear Jokik vhodd puroskar bhett'ta tem dakhoina vo Jokik hero korpachi cholchitrak dixa na. Punn aplo ixtt Lawri porot mell'lo ani Lawri aplea niz mogachea girlfriend-ak porot bhett'taa.
Dum Maaro Dum hem hindi cholchitrant ek vost thavi korta. Hem cholchitr, Goenkarank tachea susegadponnantle utthounk bhair sorlam. Hem cholchitr Goenchea ostoreank chodd sovai zal'lea porim lekta mhunn zaito arop kela ti ek zoitachi survat. Goeant vaitt asa tachi safay Goenkarancho sohokar nastana kednach zauchi na. Goeant kosli safai korunk Goenkarachi goroz. Punn zaitea zannank oxem dista ki hi safai politician kortole mhonn. Hi safai saddo susegad Goenkar utt'toch zaunk lagtoli.
Drug mafiacher marekar dis yetat te vellar Micheal Barbosa hea nanvacho monis he odruxttantle Goeantlea `drug lords' hankam salvar kortat. Micheal Barbosa ek savlli koxi konn taka pollena. Bhitorlo monis aslolean Goeant 'drugs' chodd togta mhonn hem cholchitr ugtem korta. Kitem amchea zonn eklea bhitor ek Michael Barbosa asa to vaittak chotrayen tenko dita ani bhailean tache add asa mhunn soglleank dakhoita. Osle Micheal Barbosa Goeant asat tanchi savllich amkam dista; tori astana ACP Kamatachea sangnneam pormannem savlli distta zalear monis khoim tori lagim asa. Amcheach bhitorlo Michael Barboza-chi safai korunk amche mukhar avhan ubem zalam.
Devosanv ani magnnem nastana Goenchi sonskrutay purn' zaina. 'Dum Maaro Dum' hem cholchitr aple dakhovnen bhagivont Antonik dovim fulam bhettovnn kitem-i magtai tem tunvem chintunk zaina te suvater tuka mellta oxem dakhoita. Devacher bhavart aslolo Joki xevottak heach fulachi bhett korunk, cholchitracho xevott ugto korta. – VI
0 comments:
Post a Comment