Khoinchei poristhitint, Rashtriya Mahamarog rund kortelech. Mahamargachea rund korpak virodh korpeani ubarlelem andolan rajki hetan ubarlelem assa. Tachem apleak kainch poddunk nam oxem Bhouxik Bandkam Montri Churchill Alemaoan kal spoxtt kelam.
Kal Moddganvam saras Goachi mahiti diupak Potrankar Porixedhent portrakarani vincharlelea proxnnank zap ditana hem mot utrailem.
Anmod tem Ponnje poriantlea rashtriya mahamargachea rundi korpak lagun atam fokot 130 band kamacheruch havoll eteli zalear mahamarok 17chi ankhnni hea mhoineachea xevottak meren zateli oxem spoxtt kelem.
Je podotin ut’tor Goentlea mahamargachi ankhnni kelea tech podotin dokxin Goeantlea mahamargachi ankhnni kortele oxem Alemaoan mukhar sanglem. Goeant ghaddianchea ankddean disan dis vadd zait assa, taka lagon mahamarog rund korop hi kallachi goroz. Aple rajki jinnent apnne fokot Goenchem hithuch pollelam ani hea mukharui tem poitolom oxem hea velar spoxtt kelem.
Zuari nodi voilo pul fuddlim 10 vorsam urtolo achi khatri nam. Taka lagon ho pul veguinchea veguim apleak bandun puro korpacho assa. Ho pul rashtriya maha marog pradhikarnni khala eta. Taka lagun to bandpachem kam tankanch ditelem toxench tacher tech nirnnoi ghetele oxem hea velar sanglem. Hea velar khateache pradhan mukhel abhiyante J. J. Rego ajir asle. (SPT)
2 comments:
Maka dissona hea" MAHAMAROG " konkani utor. Ami kiteak RUND marog mhunonant?
Mogall ixtta, Makai toxench dista tuven utor vapurlaim tench anven vaprunk zai aslem. Punn moje toklen tem ailem nam tea vellar. Punn hea fuddem aum tujem hem utor monant dovortolom. Punn Konkanint "Highway" mhunnche "Mahamarog" hem sarkem assa anven then topasun pollelem. Torui aum moje motint tem dovortolom - Menino de Valpoi
Post a Comment