Pilar: Ak'khea sonvsarak osleo karyavollim vorvim zaitem boreponn yevpachem. Katolk lok apli Igorz soddun Pentekostal zomeamni bhitor sorunk pavchim naslim, oxem Madras-Mylapore Arkidiosezicho Adari Bisp Lawrence Pius Dorairaj-an sanglem.
Ankvar Moriek bhettoil'lea Otubr mhoineachea nimannea disa Saibinn Mainchea manak Pilar Fr. Agnel iskolachea moidonar kherit songit karyavoll ghoddun haddli. He karyavollik sumar don hozar lok hajir aslo. Zaitim Katolk bhav-bhoinnim Pentekostal zomeamni bhitor sortat, tankam porot haddunk Ankvar Mariechea manak osleo anikui karyavolleo ghoddun haddunk Bisp Dorairaj-an ut'tejon diun sanglem. Katolk lok dhorm soddun dusrea zomeamni vetat ; thoim tankam fokot Povitr Pustokachi xikovnn mellta. Punn Katolk Povitr Sobha, Povitr Pustoka poros odik girest. Amche lagim Povitr Sobha, Ankvar Maria ani Sonvskar asat mhonn Bisp Lawrence Pius-an sanglem. He songit karyavollik to mukhel soiro aslo.
Atmik Bhav-bhoinnincho Ekvott-achea 66vea vorsachea ugddasak hi Marian songit karyavoll ghoddun haddlea mhonn Pilarche Sonvsthechea Xrextt Vhoddil Pri. Tony Lopes-an sanglem. Songitachea dor eka vangddean, Ankvar Mariechi bhokti vistarun Jezucho porzoll soglleam modem ximpddaunk urbha ditolem ulovop kelem. He karyavollichi prernna zaitea lokak mellun he machyer Mariecho bhovman korunk 150 kolokarank hangasor haddlim, oxem Atmik Bhav-bhoinninchea Ekvott-acho direktor Pri. Noel Menezes-an sanglem.
Karyavolliche survatek Brazilian Sonvsthechea fantteache Ponnje St. Inez aslole vangddi 'Heralds of the Gospel' hannim Saibinn Mainchi imaj gheun vatinchem pursanv kaddlem ani Saibinn Mainchi imaj machyer haddli. Pilarche Sonvsthecho vangddi ani Gõycho fanki songitkar Pri. Peter Cardozan 'Ave Maria' gayon modur suramni gavun karyavollik survat keli. Pri. Domnic Alvaresan bhoktiponnan fivnneanchea tallar Moriek vakhannun gayon kelem. Gõychim fanki gavpi Acacio Pereira, Lulu Fortes, Nezba Fortes, Silvina Soares ani Pri. Noel Menezes hannim gayonam gailim. Songitkar Filipe Fortes, Ignatius Rodrigues, Grayston Vaz, Aurvile Rodrigues, Ilan Martins, Boney Alex ani Ashley Do Rego hannim nazuk songit vazoilem. Darryl D'Souzan karyavollichem sutr-sonchalon kelem. (VI)
0 comments:
Post a Comment