NIZ GOENKAR JERUL ZOITIVONT ZATOLO MHUNNTA AMCHO UMEDVAR PAUSILIP DOURADO mulakat gheupi Bebdo

NIZ GOENKAR JERUL ZOITIVONT ZATOLO MHUNNTA AMCHO UMEDVAR PAUSILIP DOURADO mulakat gheupi Bebdo

Aum vhodde umedin ani khuxealkaen boron sogllea Goenkarank kollit kortam ki amcho ek Niz Goenkar, taka dhir dilea uprant fuddem sorla, Goenchem sudarop korchea khatir ani Goencho udeog korchea khatir sambhallun dourunk Goenkaranchi ollokh ani porompora.

Niz Goenkar Umedvar Shri Pausilip Dourado

Ami vavurtanv amche dandge fuddari fuddem soron zuzonk hea etea motdanank. Goeant motdan zalam bhouch moujechem ani ikmotichem. Azun poriant ami amchea fuddareank lokache nodre bhair dovorlele assat tanche sambhallne khatir, punn atam goroz poddlea tankam fuddem addunk loka mukhar ek ek korun. Amche tornatte fuddariani aplem jivit bhettoilam borea vaurak (kauzak), ani toiar zaleat aplem rogot passun varounk, sambhallpak amchem Goem, jem chorun ani bolatkar korun soddla Goencho, Goeam bhailea munxeani ani atanchea nennar goonda rajnitikarani.

Amche he tornatte fuddareani soput ghetla aplem jivit Goem Mai bhumi and tichea bhurgeank bettounk and sambhallunk. Tannim nicheu kela ki amchi Mai bhumi, GOEM kedich vikunk diunche nam mhunnon ani vikrek ghalunk diunche nam mhunnon kitli voddli bonni ani konnui ti laum, zoxe porim Congress sorkar NCPchea (Nagounnea Chorancho Pokx) adaran korunk lagla. Toxench hea tornattea fuddareani nicheu kela ki sodanch Goem fokot Goenkarankuch sambhallunk ani nhoi ganttiank.

Anga aple kaim prostav kollit korta tumkam mogall Goenkar bhavano ani bhoinnano, amcho poilo tornatto Umedvar zo Vidhan Sobhechea motdanank Nuvem. Tachem naum zaun assa PAULSILIP DOURADO. Ami amchea Niz Goenkar bhavam ani bhoinnam laguim tumcho tenko ani adar diunk amchea Niz Goenkar Umedvarak Pausilip Douradok, tache passot vaurunk Niz Goenkara passot ani taka jikoun addunk Goenche vidhan sobhent.

AMI ATAM THAN SURU KORUNK ZAI AMCHO VAUR, HECH GHODDIE THAN TOAIRI KORUNK ZAI AMCHO UMEDVAR PAUSILIP BHOUCH MOTANI JIKON ETA TOSO.

Odik zannkari zanno zaupak konn Pusilip Dourado to, ami tumche mukhar dovortaum ek mulakat ji alinch ami kelea Goeam Sri Pauslilip ache laguim.

Pausilip Dourado, tumcho opurbaiecho Bebdo, kaim manest nagrik ani vangddi dhondea vepareanche bhettle xarantlea eka hotelan basabas korunk kaim proxnnaver motdanache toiarevoir ani koxe porim vachounk Goem jichi moriad vibaddtat ani jika nagoitat he atanche 40 chor

Amche he sobhent vixoi kaddlo to kull ghorannem rajnitint zoxe porim 40 choranche put ani dhuvo proitn kortat hea fuddlea Vidhan Sobhechea motdanank bosunk umedvar koxe, Goem tanchea bapaichem zalelea porim ani urlele Goenkar tanche das our sevok zalelea porim

Amche vixoi anikui ghott korchea khatir ami anik ek sobha keli Pausilip Douradochea ghara laguim. Vatavoronn borem aslem ani sanglelea vellar aum tachea ghara laguim paulom.

Tachea putan anstea thondan mozo eukar kelo, mogan ani moipasan mojeach gharant ailelea porim maka dislem. Zannarani mhuntlelem assa ki munxeachem soimb poilech bhettek kollun eat mhunnon. Pausilip Dourado zaun assa bore riti mansugecho munis, aplea ghorabeachea mogacho ani ghorabo sambhallnar. Tosoch tacho sobhav kollun eta je porim to aplea avoi bapaicho sambhall korta tache velean. Tachem purvozanchem ghor azun ubem assa toxeak toxem ani tacho akho ghorabo ektaim ani ekvottan jieta teach gharant. John F. Kennedy oxem mhuntlelem assa, zo ghorabo sangatan magnnem korta to ghorabo sodanch sangatan jieta, hea utrancho maka niall ailo polloun Pausilipacho moipas aplea ghorabea thaim. Anikui sobar lok taka bhettonk ailele jedna to somajik vaurui korta ani konnacheai adarak pauta. Tech porim lok tache xim etat apleo augoddaieo gheun ani tachi bud gheunk.

Tor amchea Niz Goenkar bhavank ani bhoinnank kollit korunk ki ami kainch tumchea fuddeantlem lipoun dourinam, ami hi mulakat porgott kortaum dhor ek utran utor ani KONN, KEDNAM, KOXEM, KHOIM ANI KITEM Pausilip Douradoche hem mulakatent.

NIZ GOENKAR: Amkam tujea hea somajik vaur ani rajkarana voir thoddi mahiti diuxi?

PAUSILIP DOURADO: Aum rajnitint kednanch naslom punn ou ek boro xiklolo ani khalto somajik vavurpi mojea burgeaponnar than. Aum vaddlam noi duddvanche raxir punn koxtt korun moje torne piraier than. Moriadichem jivit sarlam, karann maka ollokh asli loz ani lojent poddop kitem poi ti. Mojea avoi bapain maka Dev bhirantin vaddoilolo. Jivit maka augodd naslem ani sompeim naslem, bogor zaun asli ek xiddi ji aum choddonk vavurtalom. Mojem sopon zaun aslem mojea koxttancho unddo khaupak manan ani moriadin, ek vepari zaunk ani ek ghorabi jivit jieonk. Aum sufoll zalom chintinastanam itlean veguim, punn borea korneani ani koxttani.

Tuji survat koxi zali?

Survatek aum ek forman hea ud’dhear aslom minachea dongrar ani tea uprant aum min pattoupi zalom. Mojim sopnam vhodd aslim ani aiz aum minacho dhoni zalom. Moje laguim barje assat jeo minacho pitto vortat

Goenche Tornatte, tankam tum koxe porim kamank laitai?

Dev borem korum tuven ho proxnn moje laguim vincharloi mhunnon. Oi anven sumar 100 bhurgeank kamank lailea ani tatuntle 90 tok’ke zaun assa amchea gaunche ani lagxilea gaunche. Tankam mozuri bori ditam ani tancho boro poramos ani sambhall kortam ani maka disona he bhurge maka soddun vochot xe bhairaun moje von odik mozuri tankam meulear. Urlele 10 tok’ke zaun assa dusre Goeam bhaile ani tankam dhor vorsa sutti ditam ani tankam veg-veglleam gharani dovorlea moje dhondeache suater.

Minacho tuzo dhond’ho kitlo kaideaxir ani kitlo bekaideaxir ou lokache khoxe add assa?

Khoreponnim, moje laguim bekaideaxir minacho vepar kainch nam ani nhoim mhunnon moji euzonn nam bekaideaxir dhond’ho korunk ani vankddea margan poixe korunk. Mozo ho vepar 100 tok’ke kaideaxir ani loka laguim moji koslich uzot nam jitlei zageancher mojeo minacheo khonni assat thoim. Aum sozomotam lokacheo oddchoneom je je suater ho minacho vaur cholta thoim, punn aum tancho boro sambhall kortam ani boro poramos kortam. Maka kednach koslich oddchonn ubi zaunk nam loka lagchean aiz passun Devache kurpen. Aum sozmotam lokak kitle koxtt poddta the tea passot aum tancho boro poramos kortam ani heach passot aum tancheach bhurgeank kamank laitam ani Devache kurpen aiz passun maka hea lokan koslech tras korunk nam.

Tum zannoi astolo aum ek somajik vavurpi ani lokacho boro poramos kortam mhunnon ani heach khatir Vatavoronn montri Aleixo Sequeira maka bores tras korunk laglo pattim, mozo vauracho veovar topasunk laglo ani mojer sarke nhoi aslele arop ghalunk laglo. Jedna taka kollon ailem ki to aplo vell vibhaddta mhunnon tannem maka soddun dilo.

Aum zanno tum fatle vechnnukent Aleixo Sequeira add boslolo ani tum harlolo, tor achem karann kitem them sangxi?

Anik ek boro proxnn. Patle vechnnukent, nhoi fokot Aleixo, pun Remy Fernandesui boslolo nimannea velar. Aum bhou thoddea motani harlom ani zor tor Remy bosonk naslo zalear aum jerul jiktolo aslom dolle dampun.

Tuka atam aum barkasaien sangtam, mojea soimbhak lagon ani mojea somajim vaurak lagon, bhonvtonichea lokan ani borem magteleani maka vechnnukek bosonk lailolo. Aum Sarpanch aslom Nuvem panchayaticho ani lokak moso vaur boro laglolo ani lokacho moipas moje sovem vaddlolo. Porjek zaiti axea asli aum tanche passot borem kortolom mhunnon, Goeam passot ani Goenkaram passot. Tea velar aum Odheox aslom Youth Wing Congress Party-cho. Anven ho proxnn Congressachea unchlea odhikaream fuddeant manddlo ani tankam kollit kelem ki lokache axea bagouteli zor tor tannim maka Congressachi ticket dilear. Punn kaim rajnitint goulele munis moje add vavurle ani maka ticket nakarli. Anven mozo rajinamo dilo ani ek azad umedvar koso ubo raulom.

Punn oxem kitem vankddem zalem?

Zaitem, poile suater aum sado ani novoch zalom rajkaranant. Aum zome korpak toiar naslom, aum goondagiri ani dadagiri korunk toiar naslom.

Mozo hetu mojea jivitant zaun aslom nittaiecho marog and somor zogddop. Maka naka aslem tornatteank poixe diun ani motdarank poixe diun bigddaun uddounk. Aum dhor eka gharant cholon bounlom. Zata titlo adar ektailo mojem nami potr bhorchea adim. Lokan maka ugtea athani eukar dilo.

Aleixo Sequeira he polloun abuz zalo ani mojea zolmachea disachi kariavoll Nuvem Igorje mukhar polloun, zaka sumar 8000 lok ajir zalolo, to sarkoch gunvlo. Mojem nanv disan dis navlokik zaunk laglem

Hea ghoddboddan, Churchill zaka mollam ani tufana laglelim tannem apli novo pokx Save Goa ghoddun addli, jea pokxant uprant Goem pussun uddoilem. Tannem maka aplea pokxeachi ticket diupachi tozvit keli, punn anven ti nakarli karann tannem moje laguim poixe magle te moje laguim ghoddonasle diunk ou mojea bolsa bhair zale.

UGDP fuddem sorli maka ticket diupak. Anven porot nakarlem kiteak aum UGDP ticket ani Railway ticket ekuch sozmotam. UGDP pokx zaun assa eka ghorabeacho pokx. Uprant Aleixan Remy Fernandes-ak fuddem ghatlo mojim motam foddunk ek trikounn zali hea zuzant.

Mojea sangata konnuch rajkarbari ou vhoddle munis nasle her don umedvaram porim. Anven poixe konnakuch vantunk nasle ani moje sangata goonda nasle. Itleim asson mojem zoit tharlelem aslem dubava viret. Punn aum harlom sumar ek ozar motani.

Xevttak tum koso harlo?

Atam chit diun aik. Lharam sogllim moje vatten mari. Churchill ani Aleixo abuz zalele ani tancho zomnir paim lago naslo soddun Lottle. Anthun anven matso mar khalo.

Motdanachea ek dis adim, sanjechea velar, fongotteancho xinvor zalo dhor eka konxear ganvchea. Lokak hem vichitrponn kitem tem zanno zaunk zai aslem. Aleix-ache chomche lokak sangonk bhonvonk lagle ki anven mojem nami potr pattim gheltam mhunnon, Aleixachea vordan ani tannem maka khub poixe dilea mhunnon. Hi zaun asli as’sol fott. Hi fotkiri gozal sogleak ximpoddli ani akhea motdarsongant. Hi zaun assa kanni ani heas passot aum harlom ghele vechnnukent. Hi fotkiri khobor sogleak poddon aum he vechnukek harlom.

Anven ani mojea adareani zaite proitn kele pun vell nam zalo ani jedna policek kollit kelem, te berea kanar ghalunk lagle ani Aleixo vazoita tea tallar nachonk lagle

Aleixo kuslelea mellea kallzacho munis. Itlo khala denvot apleachi zutti sambhallunk mhunn aum noko zalom. Vechnnuko etoch to zago zata nam zalear xendri ghalun nidta.

He pautt tum konna laguim virodh bospacho assai Aleixo ou Mickky?

Nam he pautt toxem kainch nam. Punn he pautt tankam mozo fuddo korcho poddtolo. Tankam dogainkui nanv nam. Ek chor ani ek bemoriadicho. Aleixo sodeak sarko nidonam, karann taka atam khobor assa ki to moje laguim harpacho assa mhunnon. He pautt tachim devchari kortubam kainch cholchimnam. Aum taka he pautt koxei porim haroitolom. Tachech motdarsangant taka eukar nam atam. Tannem dakoun dilam koxe porim apnnem ganvchea tornatteank vibaddlea aplim bolsam borunk. Amchea tornatteani taka ambddun ghatla. Amkam anik amchea ganvanchem nisonnton zalelelm naka.

Mickky, Nam baba nam! Amkam osle olkhea molache, bemoriadiche munis amcho ganv vibaddunk naka. Zor to tachi nodor he vatten assa zalear tannem tem visronk zai, karann taka NCP apli ticket Banaulent ou Nuvem bosonk diupache nam. Tea passot to goddiek nimannea velar UGDP-int udki marun tanche ticketicher bosonk xekta. Niz Goenkar taka motam ghalpache nam. Te fokot moriadichea munxeak ani nhoi bemoriadichea munxeak motam ghaltele

Tujea motdansangak tuzo fuddem kitem korpachi kariavoll asa?

Poile suater maka jem kitem borem tem poilem korunk zai, lokak adar, boreo korneo zata te baxen. Zor aum Amdar zalom passun zalear aum kedinch bodolcho nam. Aum he vechnnukent ek Niz Goenkar mhunnon bostolom, Menino de Valpoi, Pokx ghoddnar-achea axirvadan ani her tachea soglleam ghoddnar vangddeanchea axirvadan. Maka zai soglle Niz Goenkarani ekvott korunk ani broshtachar mundak than umttaun uddounk, zo adartat broshtachari Congress ani dhormvegllochar korpi BJP. Amkam zai ticket vantpi khate zoxe porim UGDP ankam kobar korunk. Amkam zai fokot Niz Goenkar fuddem soron he brosthachar sompounk.

Aum ek azad Niz Goenkar umedvar mhunn he vechnnukent bhag ghetolom.

Mozo poilo kaido ani vaur zaun astolo amchea tornatteank nokrek laupacho. Jem rosteachem mezop cholta Nuvemchea tem bond korunk ani khoincheai dongravelean tem gunvdaunk je suater konnakuch tras zauchenam ani kainch luksonn zaunchem nam.

Aum fokot ekuch pautt vechnukek bostolom anik tea uprant boscho nam. Ghoddiek aum chodd korunk xekchonam punn aum mozo ugddass sassnak urta toso vaur korun vetolom, ek ugddass PAUSILIP DOURADO.

Niz Goenkarank tuzo kitem nirop?

Mozo nirop, vechnnukenk poixeanchi nhoi mhunn gundanchi goroz nam. Aum harlam bhou thoddea motani, mojea gaunchim soddun ek 150 motam, urlelim sogllim maka poddlelim. Tech porim aum mandun ghetam ki moje laguim ek boro PRO nam zalo ani aum matso chodd khoxechea nadar urlom soglo lok maka tenko ditolo mhunnon. Aleixan nimannea vellar lokak fotoilo aplim addgam naddgam korun pun he pautt tache laguim oxem korunk ghoddchem nam. Aum ek Niz Goenkar, ani zoit amchem zatelem, zoit dhor eka Niz Goenkarachem vanchounk amchem Goem ou kitem urlam tem Goenchem, lutlea uprant atanchea rajkarbareani.

Mozo hetu ani dhor eka Niz Goenkaracho hetu zaun as “Tum niz rau ani tum jiktolo ani tuji udargoth zateli. DEV BOREM KORUM.