Gõykaramni Romi Konknnik tenko dilo zalear amcho xinn na kiteak mhaka ani mhojea osleam zantteank bhav-bhoinnink nagri Konknni poros romi Konknni odik bori vachunk borounk yeta. V. Ixtt thambonastana Romi Konknnik tenko dita, hacherui amcho xinn na. Amcho xinn amche padri bhav Gõychea Igorzamni vigarponn choloitat tancher.
Amcho xinn amche padri ani amcheo madri iskolam choloitat tancher. Kiteak he amche padribhav ani heo amcheo madri bhoinni amchea bhurgeanchea monant nagri Konknnicho mog ghalunk tras gheunk sodinant. Amche nove pillgechem Gõykarponn ani Bharotiponn samballunk ani vaddounk tankam nagri Konknni ani Hindi tankam kitli gorjechi tem a,mchea padri ani madrinchea motint yena tacher amcho xinn.
Gõyant nimannea 100 vorsam modem Kristanvancho ank 65% aslo to atam 26% zala ti amkam khobor astoli. Modle Asient Iran, Irak, Lebanon, Israel desantle Kristanv aplo des soddun Ostomtek vochot asat mhonn ami aikolam astolem. Jezu Modle Asientuch zolmolo ponn te svater atam Kristanvank ravpachem matui mon na.
Hich poristhiti Gõyant yevpacho vell zala. Gõychi diosez bhov adli ani amchea padrimni-madrimni sogllea sonvsarak vochun lokachi seva kelea, ponn atam amchea bhurgeanchem mon fokot bori inglez xikchi Europak, Amerikek vochun bori sirvis korchi, zata title duddu komavche, aple familichea jivitacho ibadd korcho , itlench zalem. Gõycho mog na. Gõy bhailea lokachea hatant ghalchem, itlench puro. Amchea bhurgeank nagri Konknni ani Hindi xikounchi ani inglezui xikounchi ani tankam Gõyantuch dovorche hem amchea padrink – madrink poddunk na, hoch amcho xinn. (Courtesy Vauraddeancho-Ixtt)
0 comments:
Post a Comment