Boreaponnacho Madd - Boroupi Freddy Agnelo Fernandes, Dubai

Zaite zannar sangtat, hem zhad upzollem mhunn Afrikak
Maha-sagor par korun paulem tem Goy xarak,
Hea zhadda itlem dusrea zhaddamni boreponn diunk nam konank
Deva tuka argam ditam hem zhadd dilem mhonn Goyemchea lokak



Goyche veller, ganvamni thikann tuvem kellem,
Kandde tuje vaddon ontrollak thenktaxem dislem
Lamb rund chutt’tam tujim varear khelltat tem pollelem
Kovol tuzo nallamni bhoron lambtta tem dekhlem

Tuje vorvim bhattkaranchem jivit uzvadllem
Goriban tuje vanxe, chutt’tamchem ghor bandlem,
Render bhavan tuji sur kaddun fenniechem nanv fankoilem
Ramponkar bhavamni sonnachea dorien rampnin nistem marlem

Tujea kott’tieanche dovlle kelle
Virrancheo san’ni ani suknneank pinzre zalle
Tujim chutt’tam vin’nun mollanche ghorak zodh bandle
Tujea vaieanche, poieank go’ope poddle

Tujea nallachem omrut udik ankam dilem
Chun’n ruchik mirem-vanen koddek doloilem
Tuje nall sukovoun kobreachem tel ami kaddlem
Telachi pendd zon’varank khann zalem

Tuje pidde, kisram ani xhavkanchea ujean ami bhat ukoddlem
Tujea chutt’tieanche kondkem korun xet ami roilem
Fest-porbek san’na ani goddxem nallanchem zallem
Tujeo pisnureo, poyeo lasun Natalancho kunsvar bazun kalliz dhados zalem

Madda oslem zhadd khoinsor amkam meutolem?
Goyemkaranche tonddar sodanch tujem boreponn gautolem
Hem Devachem dennem amkam favo zalem
Ak'khea maddachem kainch bhair nam poddlem
Maddan aplem purai jivit mon’xakulak vomplem