Amchi Sodvonn by Freddy Agnelo Fernandes, Dubai

Provadeani ani baknamranni borovun sorlle kall
Bapachi khuxi modunk nasli putachi chal
Put zalo razi monxakullacher denvli mayechi vall
Xobd zavun monis, Devachea boreponnachi utlli sal
Bapacho hukum palunk, monxakullak sodvonnechem zalem dhar
Amchim patkam ghevun aplea matear sodoiloi patki sonvsar
Kirkoll monxanchea jivtacher uzvadllo kakluticho rupkar
Bhag monxakullachem Jezu vorvim amkam daiz sorgar

Devput zavunui nixtor moxachea hatant sonsle tras
Bapaxim maglo monxakullak disa-dispotto ghiras
Matear kanteancho mukut angavlear podlo rogtacho paus
Amchea patkancho khuris gevun khandar dongor chodlo khas

Niticho munsubidar zavunui zalo razi moronk khursar
Fapsololi kud amchea Somiachi vingli korun sobemazar
Churchure nastonam hat paiamcher kelo killeamcho var
Bapachi khuxi mhunnon xinnonastanam pran sodlo Khursar

Keddi maya amchea Devachi, chakli zor Tanchea udaarponnachi
Monxakullak bhettoili kudd aplea ekleach apurbayechea Putachi
Tankunk zaunchi nam amchean kholai Dev-Bapachea mogachi
Patkachea ghulamponnatle sutken, zalim ami sorgimchim dayiji

Dor vorsak Povitr satoleant, Jezuche koxt-moron ami niyaltanv
Tori Pun amchem patki jivit bodlunk ami kiteak visortanv ?
Patki jivit sodunk nichov ami korum-ia gevun Devachem nanv
Voikuntant amkam sogleank sasnachea sukacho mukut favo zanv

Anvdetam povitr satolem sogott Khristi porjeak, toximch, oprub dhennim ani besanvam punorjivont zalea Jezuchim, sogleank kuxallborit ani anondborit Paskamchi porob anvdetam