Bhurgem, Ek Devachem Dennem, Boroupi Freddy Agnelo Fernandes, Dubai

Sokallchea fanttear fogoteancho gonn-gonn aikolo
Vegim vegim ghorantlo hanv bhair sorlo
Xezarnin kuxallkaien ulas sodlo
Vhoddlea putache bailen babuleak zolman haddlo

Zaitech vorsamni xezarnnicho ghorabo uzvaddlo
Xezareank kuxallkaecho umballo funtlo
Vaddeant sogott lokacho anvddo puro zalo
Somestanchea tonddar sontosacho hanso dheklo

Xezarnin rokhddoch Devacho upkar attoilo
Lagxilea Khursak vati-dumpacho pormoll ghalo
Dimi ghalun dilolea dhenneamcho dinvas kelo
Dolleantlean tichea dukancho vhal denvlo

Dhakto putui kazari sakramentan bhitor sorlo
Vorsa bhitor tachoi ghorabo uzvaddacho zalo
Xezanin ghorant mitayecho puddo haddlo
Dusre sunnen sobit bayek zolm dil’lo

Tichea tonddar sontosacho hanso naslo
Fogoteanchoi gonn-gonn aikunk nam koso ?
Hanv ekdomunch chinttunk poddlom
Kuxall’kaecho umballo kiteak virgovlo?

Xezarnnichea ghorant umeticho sad aiko naslo
Lagsarlo khurisui vinglo-so kiteak dislo ?
Xezari-soireancho zomo kiteak bigoddlo ?
Cheddum zolman haddlole avoyk, prosn upraslo

Cheddo zolmolear itlo sontos kiteak korcho?
Ani cheddum zolmolear khaltikaecho mukutt ghenvcho?
Somazan ho don tonddancho rupkar kiteak appnavcho ?
Cheddo-cheddum vortovta kallzacho kuddko avoi-bapaich

Kazari jivitant sogllim ami bhurgeank axetanv
Tor put-dhuve modim ami ontor kiteak kortanv ?
Devan dil’lea ginian-monancher uzvadd haddum-ia
Bhurgem ek Devachem dhennem mhunn manun ghevum