Saturday 25 June 2011

Amche Svotontr Soinik - Boroupi Tomazinho Cardozo

Junache 18ver, 2011, Ponnjechea Azad Moidanar ji kornni Gõychea svotontr soinikanchea hatantleant ghoddli ti khorench ek lozechi ani teach khatir niz Gõykaramni ani niz Bharoteyamni tacher koddok nixedh marpachi goroz asa. Osli dollddiri kornni adharun tannim aplinch monam kitlim oxir asat tem dakoll kelem.
Nixedh: Mullavea xikxonnant Inglez bhaxekui sorkaran onudhan diunk zo nirnnoi ghetla tacher amche svotontr soinik nixedh martale. Sorkarachea kosleach nirnnoiacher nixedh marop hantun kainch vaitt na. Lokxayent porjek dilolem tem ek sadhon zaun asa, zaka lagun lokxay odik okhondd zata, odik suddsuddit zata. Teach disa kaim kolakoramni ani lekhokamni-i nixedh marlo. Apnnak kitem sangpachem asa tem sangun tannim lokxay pod'dotin apleak pulisanche svadhin kele. Jea karannak lagun to nixedh ghoddoun haddlo tache vixim sorkarak dakovpacho porjechi thakot tannim sorkarak dakoili. Sumar 52 kolakar ani lekhokank pulisen dhorun vhelet. Osle lokxaye pod'dotin ghoddoun haddlole nixedh kaim vellar amchea rajyant goroz asa hantun matui dubhav na.
Bhroxtt konn?: Punn amchea svotontr soinikamni jem kortub adharlem tem mat dukhichem ani chukichem asa. Sorkari karyavoll somplea uprant thodde svotontr soinik sorkara add nare gazoit Azad moidanar bhitor sorle ani sarke Hutatmeank bhettoilolem protik vo Yadgiri asa -'Martyrs' Memorial - thoim gele. Rajpal, Mukhel Montri, ani her manestamni hutatmeank bhettoilolim fulam thoim aslim tim sogllim kaddun uddoilim. Hea bhroxtt lokamni ghal'lim fulam kaddat mhunn nare gazoile. Durdoiv amchea svotontr soinikanchem. Dusrea utramni amcho rajpalui bhroxtt asa mhunnlem oxem chintpak kainch horkot na. Tannim Mukhel Montreacherui to bhroxtt mhunn xik'ko marlo. Mukhel Montreak Gõyche porjen vinchun kaddla mhunnttoch hea amchea svotontr soinikamni Gõyche porjekui bhroxtt mhunnli hem-i sid'dh zalem. He svotontr soinik kitle nitoll ani promannik asat kai? Hea svotontr soinikamni hem visrunk favona ki jednam te dusreank bhroxtt mhunn ek bott dakhoita tednam tacheach hatachim tin bottam takach bhroxtt mhunn dakoll korta.
Duxtt kornni: Itlean sompunkna. Rajpal, Mukhel Montri, sorkari odhikari ani her fuddareamni ghal'lim sogllim fulam kaddun kuxik uddoilea uprant tannim bazarant melltoleo udkacheo battleo haddun tea zagear tantuntlem udok xitoddailem ani to zago xud'dh kelo mhunn jahir kelem. Bazarant mellta tea udkan zor oxud'dh zal'leo vostu xud'dh zatat zalear hea svotontr soinikank mhojea kallzantli vinonti asa. Bazarant mellta tea battleantlea udkan tannim nhanvchem ani poile ani voile suvater tumchim oxud'dh zal'lim monam xud'dh korchim. Amche svotontr soinik zor khorench xud'dh asle zalear tankam Gõychi porza nivddun haddun hem rajeo tanchea hatamni ditoli asli. Punn kotta! Zankam nivoddnukent 100 motam poddpachi xok'keata na te svotontr soinik porjen nivddun haddlolea lokak bhroxtt mhunnttat. Churchure!
Avhan: Amchea svotontr soinikank Gõychea sogllea sorkaramni ani odik korun Digambar Kamatachea sorkaran zaiteo sovloteo dileat. Khoincheach rajyant jitlem svotontr soinikank mhotv na tem Gõyant mellta. Heach karannak lagun azun poriant, Gõyche svotontrtayechea 50vea vorsa uprant poriant novea svotontr soinikank sorkar mandun gheta. Hem fokot Gõyanch ghoddta. Itleim asun he svotontr soinik sorkari karyavolli bond uddovpak dhomki ditat. 18 Jun oslea mhan disacher 'boicott' ghalun tea mhan disacho ani teach borobor Gõykarank zage korpi fuddari Ram Monohar Lohia hancho okman kelo mhunnlear lottkem zanvchena. Amchea svotontr soinikank ek avhan asa. Tumkam zor khorench kallzantlean dista ki sorkarak 'boycott' korunk zay mhunn zalear sorkar dita tem mhoineallem 'pension' gheupak 'boycott' korat. Tednanch tumi khoreanich svotontr soinik mhunn provar zatolem.

0 comments:

Post a Comment