Ponnje: Ghoddtat teo ghoddnneo polleunk vegllench dista, yoga kortolo guru Baba Ramdev bhroxttachara add kumpasar aplem dhoronn sadoita. Desantle pordesant aslole kalle duddu portun desant haddunk to vavurta mhonn chollvoll korta. Bhaxechea madeomacho vad, Godhra, Moddganv bomb sfott zaleat te des oskot korpacheo yevzonneo Hindu kranti suru korpak pavum eta.
Baba Ramdev, Kiran Bedi (jinnem pulis odhikarponnachi nokri soddlea) ani somaz sevok Anna Hazare him niropradhi veoktinchi aghadi (front) zait tori, tancher adharun Hindutvache zome duddvanchea pottleancher apunn miroitat. He monis aplem xanneponn vaprun hea veoktincho vapor kortat odik korun Ramdev hacho, kiteak tache fattlean chombeamni lok dhanvta tem tanchea faideachem zata.
Naddbudhimni choltole Hindu mullvadi Bharot des foddunk vavurtat mhonn choddxea lokak khobor na. Halinchea disamni kitem ghoddta ani ghoddlam tantun tanchim noxttim kortubam sarkim ugtim disun yetat. Fattlea dha vorsank thavn desant mullvadeanchem boll vaddot gelam, gaddiyank uzo ghalop, muslimank, katolkam marop ani sabar zageancher bomb ghalop hacho probhav soglleacher zala.
'Medium of Language' hacho vad-ui dhormatit ani lokxahichea mon'xank zagrut zavpak ulo marta. Karonn mullvadi veg-vegllea rupamni loka modem guspagondoll rochunk thambonastana vavurtat zaum to bhaxecho proxn, zaum to bhroxttachara add chollvollecho ani somajik jivitache xegunn porgottun mullvadi fottingponnam choloitat.
Mullvadi monache monis nhoich sorkari khateamni bogor surokxonache seventui asat mhonnlear fott zaunchina. Halinchea kallar ghoddlolea bomb sfottamni surokxechea mon'xancho-i hat asa mhonn gomun ailam. Fouzent poryan oslim khotam asat. Gõychea pulisam modem legun RSS-acho sohokar ghevpi asat mhonn gomlam. Osle hozaramni mullvadache monis sorkarant asat, te guspagondoll korunk ravtat. Koslem-i nimit melltolem kai mhonn vatt polletat. Toslea vellar dhomatit ani lokxahichea mon'xancho koslo zabab zaunk zai? Aiche potrkar, je sota pormannem aplem kam' kortole mhonn bhasaitat, te legun dhormvadeank boli poddtat ani tanchem boreponn loznastana porgott'tat.
Halinch Gõyant zalolea bandhachea fuddareamni Inglez madeomachea iskolank sorkari onudhan nakarunk maglem tem mullvadeanchi tozvit, apli sot'tea dusreancher thapunk. Konknni ani Marathi bhasanchea fuddareamni sabar toreche yuktivad ugtaile zalearui Katolk lokache dolle bond korunk zainant. Kiteak tanchea monant RSS-achem mon riglolem asa.
Inglez kaddun uddovpachi tanchi tozvit cholta mhonn ugddapem zata. Ek pavtt Inglez na keli mhonntoch TV-icher ani akaxvannicher sthanik bhaxentlean apleo xikovnneo vitraunk tankam sompem zatolem. Atam poryan kaim Bharoti potram, satollim ani ek novi agensi RSS-achea tabeant asat. Hachi lokak khobor legun na.
Zaite zann asat, te dhormvadi desak gombhir sonkott haddpi mhonn sot mandunk toyar nant. Sanath Prabath jem Gõyant suru zal'lem tacho poryan bomb sfottant hat asa mhonn vad choltalo. Naturam Godse, zannem Mahatma Gandhicho khun kelo, tannem khun korche adim RSS-antlo rajinamo diun bhair sorlo kiteak RSS-ak khunacho zababdari korina zaunk tannem oxem kelem. Oxe toren RSS guptim vavurtat, tuka tachi khobor legun aschi na. - Courtesy Vauraddeancho Ixtt
0 comments:
Post a Comment