Ponnje: Gõycho sorkar eke vatten sorkari tizori khali zali mhunn pirngouta. Punn dusre vatten aplea montrimondollak novim unchamolachim mottoram dita. Fattlea 10 vorsank Gõychea sorkaran sumar 6 krutt rupia khorchun aplea montreank ani veg-vegllea mondollanchea 'Chairman' hankam IAS odhikareank nove torechim 95 mottoram dileant. Novim mottoram ghetleant teach kalla modem 59 mottoram pornnim zaleant mhonn 'scrap'-ak kaddleat.
Montreanchem magir tem khoimche ani koslei mottor asum tea mottorant ek lakh kilometram poinn kelea uprant tem mottor kuxik dovortat. Adim 75 hozar kilometram poinn kelea uprant mottor anik vaprinasle.
Angache kopdde bodoltat toxe matxem pornnem zatoch vo bazarant novim mottoram yetoch rokddinch novim ghetat mhonn Gõy sorkarachea duddvam khateantlea eka unchlea odhikarean sanglam.
Teach odhikareache sangnne pormannem Gõyche choddxe montri "Ienova' sarkea 'posh' mottoramni bhonvtat. Hem pollevn atam sorkari sochiv (under secretaries) poryan oslinch mottoram gheunk magtat. Punn urfattem Gõyche montri matr novea ani mharog mottoranchi vatt pollevn ravtat toch odhikari sangtat.
Mottoram vixim odik chovkoxi kortoch Gõycho sorkar dor vorsa 9 tori novim ani chodd molachim mottoram montreank, sorkari sochivank ani mondollachea 'chairman'-ank gheta. Hakach lagun fattlea 10 vorsank mottoram khatir sorkari tizorentlean 5,98,68,123 rupia bhair kaddche poddleat mhonn duddvam khateantlea odhikarean V. Ixttak sanglem.
Ankddevari ekttaim kelea tea pormannem 2000-2001 vorsa Gõychea sorkaran montream ani heram khatir 9 novim mottoram ghevpak 67,3,103 rupia khorchileat. 2002 vorsa anik 6 novim mottoram ghevpak 28,73,111 rupia sorkari tizorentle bhair kaddle.
2003 vorsa 10 mottoram ghevnk Gõychea sorkarachea duddvam khatean 40,69,422 rupia monzur kel'le. Hantuntlea 6 mottorancho vapor montri ani tanchea kocheri khatir kelo. Ani urlolim char mottoram her sorkari khateank dilim.
Tea uprant 2004-05 vorsa 74 lakh 44 hozar 469 rupia khorch korun 13 novim mottoram ghetleat mhonn nond kel'lem asa. Hantuntlim 7 mottoram Gõychea montreank, ek advocate general, ek virodhi pokx fuddari ani urlolim 4 mottoram heram khateank dil'lim.
2006-07 vorsa 8 novim mottoram ghevnk 51, 61 hozar khorch zalo. Zalear 2008 vorsa 15 mottoram ghevpa khatir 1 krutt 9 lakh 40 hozar khorchileat. 2009-ant anikui 7 novim mottoram ghevpak 62 lakh 25 hozar khorchileat.
Tea uprant 2010 vorsak 4 novim posh mottoram ghevpak 37 lakh 18 hozar sorkaran moddle. Chalu vorsa sorkaran anikui 9 novim mottoram ghetleant. Tancho khorch 75 lakh 47 hozar zala. Hem voros sompta mhonnosor aam admiche sorkar anik kitlim novim mottoram ghetolo kai? ho proxn Gõycho aam admi vicharta. - Courtesy Vauraddeancho Ixtt
0 comments:
Post a Comment