Ponnje: Gõyant dispott'ttim bhonvddekarancho ankddo vaddot veta. Gõyche suttkechea 50 vorsanchea itihasant hea vorsa 30 lakh odik bhonvddekaram Gõyant yetolim mhonn odmas korun Gõychea Poryotton Khatean jahir kelam. Hea vorsachea fattlea 8 mhoineamni, dexi toxim videxi 21 lakh bhonvddekaram Gõyant ailim mhonn Poryotton Khatean nond kelam.
Dor vorsa dexi toxem videxi 22 lakh odik bhonvddekaram yevn vetat oxi ankddevari mell'lea. Punn gelea vorsa ho ankddo 25 lakhancher pavlo. Punn hea vorsa dexi-videxi bhonvddekaranchi ankddevari vaddteli oxem khatri divn Poryotton Khatem sangta. IFFI ani Gõychea Saibachea festak lagun Gõyant khup bhonvddekaram ail'lim distalim. Punn atam Natalank ani Novea vorsak lagun bhonvddekarancho ankddo vaddtolo mhonn Khateantlea unchlea odhiakarean sanglam.
Gõyant kochreak lagun Gõychea khupxea dorya vellanchi kheritponnim Saxtti vatthar borich vaitt doxa zalea ti potrkarank vellancher gel'le kodden disti poddta.
Majorda, Kolva, Bannavle, Betalbatim sarkea vellancher kochreacheo raxi poddleat. Kaim zageancher bhonvddekarank bhonvpak poryan tras zatat, zalear kaim kodden nakak dhorun bhonvddekaram bhonvtat tem dixtta. Heo choddxeo vello panchayat vattharant yetat. Punn hangache khoinchech panchayati kodde, ho kochreacho proxn soddovpak koslench dhoronn na mhonn gomun ailam.
Hangache khupxea dorya vellank tenkun novim-novim ghoram vhoir sortat. Kochreachea proxna vixim Panchayatim kodde koslench dhoronn vo yevzonn nastanam, hea novea ghorank Panchayat lisensam koxi dita zait?
Majorddecho ek sthanik Caetano Goes sangta tea pormannem Panchayatichi gram sabha zata tea vellar ami kochreacho proxn voir kaddtat, punn titloch vell tacher bhasabhas zata, uprant omtea kollxear udok. Amchich Panchayat oxem nhoi punn Saxtticheo soglleoch Panchayati kochreachea proxna vixim be-zababdari asat. Disandis hea kochreachea vaddtea proxnak lagun hea sobit-sundor vellancho vibadd zavpak lagla oxem Xri Goes fuddem sangta.
Ganvcheo Panchayati, sorkar ani poryotton khatem ekttaim yevn kochreachea proxnacher upai gheupacho vell aila. Na tor fuddarak Gõycheo dorya vello amchech pillgek samballun dovorpak kotthin zatelem mhonn Kolvencho zanntto Xri Jose Gomes aplo husko dakhoita.
0 comments:
Post a Comment