Ponnje: Poryavoronnam vixim dor ek sonvstha, dor ek mondoll ani NGO songhottnnam produxonnam add aplo virodh kortat. Punn hacher sorkar ani lagu zatele odhikari aplem lokx ghalinant. Gõyantlo lok tore-torechea produxonnak disam-dis fuddo korta. Ani samaneo mon'xak her soglle torechea produxonnam poros mottoranchea dhunvrachem produxonn chodd zata.
Gõyant mottorank dor mhoineak 48 hozar kilolitr dizel zalear 12 hozar kilo litr petrol-cho vapor zata. Hem oxem ghoddlelean, dhunvracho vaitt porinnam bhorpur vaddla, tech porim Goychea poryavoronnak mottoch dhoko uprasla oxem kaim zannkaramni V.Ixtta-k sanglem.
Gõyant dor mhoineak itlem petrol ani dizel khopta mhonn 'Commercial Tax' khateache odhikrut khobre pormannem, Gõyant sod'deak 5 lak 70 hozar “two wheelers” asat ani dor vorsa 45 hozar odik novea motorsaikolincho-I aspav asa.
Novim-novim motoram ani jipi sarkeo gaddiyeo vikteo ghetat. Oslea gaddiyank bhorpur magnni asa. Motoranchi nondnni korpi khatea kodde, fattlea vorsa 12,800 novim motoram nond zalim.
Amchea lhanxea Gõyant itlea motorank lagun dunvrachem kitlem produxonn zata tem odmas korum yeta.
Sod'deak Gõyant dor dha mon'xam fattleam eka mon'xa kodde motoram asat. Gelea ekach vorsa bhitor Gõychea Ieradari Khatea kodde 34,215 motorsaikolinchi nondnni zalea mhonn gomun ailam . Thoddo kall fattim, jea motorank rosteancher 20 vorsam adlim asat tim rosteavhelim kaddun uddovpacho nirnnoy Ieradari Khatean ghetlolo, ani jahir kel'lem. Chalu vorsachea pavsallo suru zauche adim hem panvl koddok karvay korun ubhartolet mhonn sorkaran sanglolem, ponn azun-ui koslech upay gheunk nant.
20 vorsam adleo , zanv khasgi zanv sorkari gaddiyeo boreoch vaitt doxer pavleat ani taka lagun tanche udexim prouxonn vaddta. Gõycheo sorkari 'Kadamba' bosi poryan sarkeo nant . Lokak dusro upay naslolean , konnuch tacher upay ghena. Kadamba bosink lagun khasgi bosincher koslich karvai korunk kotthin, haka lagun Gõyant mottoranchea dhul'leachem produxonn vaddunk ani choddunk laglam, oxem eke bosicho dhoni Avdoot Kamat-an V.Ixttak sanglem. Gõy sorkarak gelea sov mhoinechea kallant petrol vikpa udexim 58 krutt 47 lakh vosul zaleat . Zalear Dizela udexim 154 krutt 17 lakh vosul zaleat oxem sorkari odhikrut khob-rentlean gomlam. Itlo duddu sorkarache tizorent yeun poryan, produxon-nacher niyontronn dovorpak sorkar brooch fattim asa.
Gõyant 110 petrol pomp asat. Soglleam von chodd mhonnlear 47 pomp 'Bharat Petroleum komponeche asat, tachea fattlean her urlele. Indian Oil Corporation komponeche asat. Tanche koddlean dizel ani petrol dispott'ttim khopta. Toxench vochot thoim Gõyant kheddea- ganvamni bekaidean khup petrol viktat. Gõyant dor vorsa hozaramni turist gaddiyo choltat. Tea gaddiyanchi topasnni nanva purti Gõyche xime bhitor sortana zata. Punn ek pavtt te Gõyant pavtoch tanchi sodpus kortolo konn na. “Gõyche yeradari pulis rosteancher ubhe ravun fokot motorsaikol cholovpeank 'Helmet' ghalunk na zalear talanv ditat. Punn bakichea her gozalincher tanchem koslench lokx na. Gõyant zatolea produxonnacher tabo dovrunkuch zai mhonn Murmuganvcho potrkar Xri Ashok Chodankaran sanglem. (V-Ixtt)
0 comments:
Post a Comment