Ponnje: Raxttrik surokxechea nanvan foujechea odhikareamni Gõy apnnak visovacho zago kela mhonn Civil Aviation-acho 'consultative' somiticho adlo vangddi John Fernandes-an apli khont porgott'tailea. St Jacinto ani St. George he zunve apnnaunk tancho ekuch hetu mhonnlear thoddeam unchlea zuttiyanchea Dorya Foujechea vavurpeank Gõy vixranti korpacho zago mhonn tannem sanglam.
Kitle-i proitn kele zalear-ui, aplim mullam rombhoun, Malwan, Sindhudurg vo Ratnagiri hanchem surokxonn korunk tankam koslich khuxi na mhonn Xri Fernandes-an V. Ixtt-ak sanglem. Videxi mon'xam koddlean Lakshadweep ani Andamans hanchi surokxa korunk Dorya Fouz koslech upay korina ponn Gõychi surokxa korunk oglli umed te dakhoitat mhonnlem. Gõy, Damanv ani Diu Bharoti Loksothecho ek bhag zalolean, tem aplea tabeant korunk Dorya Foujen chintchem nhoi mhonn Xri John Fernandes-an sanglem. Dona Paula vattharant Igorjechi zomin apnnaun INS Hansa bandunk Dorya Foujecho proitn aslo, ponn jedna Igorjen nhoikar dakhoilo, tedna tannim apli yevzonn Reis Magos-ak vheli mhonn Fernandes-an ugddas kelo. Adim foujen maglolea zagear atam Rosary iskol bandlam mhonnlem. Altinho ani Ponnje bazarant asloli zomin meklli korun, foujechea odhikareank Bambolle bhorpur zomin dili, tori astana tannim Ponnjechea Mhanogorpalikecho zago soddunk na. Tea khatir az meren CCP-chea thaim ek 'Council Hall' na zaun ek 'garage' koso vapurtat.
Toxench, Kellxe ganvant 'shooting range' Dorya Foujechea tabeant asun to zago beupeogi zal'lo asa.
Dorya Fouz sodanch 'demography', Gõychea lokachea sonskrutaye ani dharmik bhav'nam thaim khellta mhonn Sonsodechea adlea vangddean sanglem. Gõy 'airspace civil' odhikareank diunche bodlek surokxon odhikareank diunchem karann Gõy Air Traffic Control Dorya Foujechea tabeant asa mhonn tannem sanglem.
