Amchea Goyant 'tourism' ho ek vhoddantlo vhodd dhondo zaun asa. Kaim vorsam fattim minacho dhondo Goyank orthik nodren chodd mhotvacho aslo, ponn aiz to kall uronk na. Goy sonvsarantlem ek nanvlovkik 'tourism'-achem kendr zal'lea karnnan, 'tourism' dhondo aiz Goyant videxi duddu odhik haddta ani teach khatir 'tourism' Goyank khub mhotvacho asa. Goychea 'tourism'-acho 'focus' mhollear amcheo soimbik vello (beaches).
Uktteo vello: Adim amcheo vello nitoll astaleot, uktteo astaleot ani tancher meklleponnim xant ani xitoll varo bhonvtalo. Vello khub rundh asleot ani vochot thoim nitoll renv dixtti poddtali. Veller ravon sezarchea eka ganvant thavn dusrea ganvant nodor poddtali. 'Sand dunes' bhorpur astalet ani lingddachim zhaddam vellek panchvo (green) rong ditalim. Zaitea vellancher kajuchim zhaddam ani zaite madd astalet ani hem vattavoronn vellank ek sundor rup ditalem. Gormechea disamni, Abril/Mai mhoineamni, lok jen'na vellancher vetalo, ten'na bhurge kaju-i khatalet. Kaim tovnaxi bhurge ratche maddanche narl chortalet.
Ramponnkar: Raponnkarancheo zaiteo khompi astaleot ani khompi fuddean voddim ani tea voddeancher rampnni. Khompin zaite ramponnkar astalet ani te hanson-khellon vell pasar kortalet. Vhoddleo-vhoddleo rampnni doriant ghaltalet ani jivem fodd-foddpi nustem rampnnin sampddaitalet.
Nirmoll vello: Tan laglear ek 'soda' vo anik kosleim pivonn pietolo mhollear kosloch adar naslo kiteak thoim 'shacks' naslint, nhoi mhonn hotelam naslim. Khoreponnim amcheo vello sarkeo nirmoll asleot.
Atancheo vello: Atam amcheo vello nitoll uronk na, uktteo uronk na ani nhoi mhonn xant uronk na. Amchea vellanchi rundhai komi zalea kiteak doria rundh zala mhunnon nhoi, ponn ami vellancher ghoram ani imaroti bandhleat mhonn. Aiz amchea vellancher 'sand dunes' ani lingddachim zhaddam sodhlear mellona mhunttlear fott zanvchina. Vellam voilo panchvo rong nanch kela. Eka vordhan kajuchim zhaddam ani madd katrun hotelam bandhleant, zalear dusrea vordhan xekddeamni 'shacks' veller ubharleant. Itlench nhoi, tea xivai khatti ani kodeli ghatleot ani vello odhik ani odhik oxir korun soddleot. Kaim vellancher khatti ani kodeli itleo zaleat ki meklleponnim bhonvonk mellona tem polloun dukh bhogta.
Vellancho vibadd: Aiz amchea vellancher ramponkar nant, tancheo khomptteo nant ani tanchim vhoddim ani rampnnim nant. Punn konn asat te zannant tumi? Lamani ani Goyam bhaile dusre lok vellancher bhorleat. He lok thoim fulam, follam, udok ani dusreo zaitea torancheo vostu viktat. Osle lok thoim xekddeamni astat. Khoreponnim amcheo vello aiz bazar korun soddleat tem polleun dukh bhogta. Aiz vellancher khaunk ani pieonk tum magtai tem tuka mellta. 'Mutton', 'chicken' adi ani vichartai to soro thoim na mhonnon na. Khoreponnim amchea vellanchea nirmollponnache 'bara Brestar ani tera Sukrar' korun soddleat.
Amchem kortovea: Goyant 'tourist' yeta hachem mukhel karann mhunttlear amcheo vello. Teo nitoll ani nivoll dovrop hem amchem kortovea zaunk zai. Tanchi soimbik sobitai mhunttlear 'sand dunes', thoim aslolim zhaddam-peddam, ramponkar, rampnnim, khompi ani voddeanchem vellancher mhotv hem rakhon dovrop chodd gorjechem asa kiteak he soimbik sundarayek lagon choddan-chodd 'tourist' Goyant yetat. Ponn atam jem kitem vellancher chol'lam mhunnchem vellancher soglli mellsann, vellancher bazar, vellancher aslolim zhaddam-peddam katrop, 'sand dunes' hancho nas korop, adi cholot ravlem zalear mat fuddarak Goyant yevpache 'tourists' komi zaunk xokta.
Oxem ghoddlem zalear bhangrachim tantiam divpi kombiek amcheach hatamni ami jivi martole ani aminch sasnnak fottovtole. (Courtesy Vauraddeancho Ixtt)
0 comments:
Post a Comment