Ponnje: Pulis khatea koddlean mahiti mell'lea tea pormannem fattlea char vorsank, sogllea Gõyant oddez hozar choriyo zaleat mhonn nond zalam. Don-don disank ek chori, ath disank ek tori khun vo gombhir ghoddnni hanga thoim ghoddta. Fattlea char vorsank jitleo ghoddnneo ghoddleat tantlea 50% guneanvanchi nit ani chovkoxi zavnk na mhonn gomun ailam.
2007 tem 2010 hea char vorsank Gõyant ghoddlelea choryancho ani luttmareancho (dacoities) ankddo pollelear hi poristhiti borich gombhir asa mhonn kollta, karonn Gõychea pulis khatean hea viximchi ankddevari jahir kelea. Pulis chovkeancher yetolea lokacheo tokrareo nond korun ghetat, punn hea tokrarinchi favo te toren vaspus zainam mhonnpachem pulis khatean dilelea ankddevari udexim gomta.
2007 ani 2008 hea don vorsank Gõyant 8 luttmareo ghoddleat. Heach kalla mdem 1,097 choriyo zaleat mhonn pulis khateant nond kel'lem asa. Dor vorsa 2008 voros meren dor vorsa 500 tem 600 choriyo zaleat mhonn sangtat. Tachea uprant hem promann anikui vaddot gelam.
Vorsak 365 dis asat, punn choriyo mat 600 poros chodd zatat mhonn hea vixim barik obheas kelo tedna onnbhovlem. 2009 vorsa hea choriyanchem promann vaddun 858 itleo choriyo tea vorsa zaleo, oxi mahiti pulis khatea koddlean mell'lea. 2010 vorsa poryan hea choriyanchem promann unnem zavnknam oxem pulis khateachi ankddevari sangta. Punn hea kalla modem luttmareo ghoddpacheo mat thoddem-bhov unnem zalem.
Hea jitleo choriyo zaleat, tantunt devllam, dukonam, ghoram, flettam hea sarkeancho aspav asa. Hea char vorsank jitleo choriyo zaleat, tantuntlea kitlea meren choriyancho sod lagla oso soroll proxn hea potrkaran eka unchlea pulis odhikareak kelo tedna tachea mukhamollar sogllench niraxiponn dislem. Gõyant dispott'ttim jitlea vegan choriyo zatat tea monan tancho sodpus matr kansvache chalin zata oso hea potrkarak onnbhov ailo.
2007 vorsa 92 vevsaik dhondekarank chorle. Teach vorsa ghoram, flettam, bongle adi hantunt 58 choriyo zaleat mhonn Gõychea pulis khateache mukhel kocherint nond kelelem asa tem pollevpak mell'lem. Teach vorsa don bongleancher ani eka vevsaik sthanachi luttmar zali mhonn nond zalem. Teach vorsa soglleam von chodd, mhonnge 25 vhodd choriyo Divchole talukeant nond zalea. 2008 vorsa vevsaik zageancher 87 choriyo zaleo, zalear her zageancher 91 choriyo zaleo mhonn riport hea pulis odhikarean dakhoilo. Mhotvachem mhonnlear teach vorsa 22 vhoddleo choriyo Ponnje xarantlea vattharant ghoddleo mhonn sangtat.
Fattlea char vorsank Gõyant kitleo choriyo zaleot tem pulisechem mukhel khatem aple torfen ankddevari dita, torui tantuntlea kitlea choriyancho sodpus zala? Kitle chor sampoddleat? Kitlea zannank khast favo zalea? Osle sabar proxnancho zabab mellunk aiz fokt samanea mon'xankuch nhoi ponn potrkarank poryan kotthin zalam. Anik hi ek mottich usko korpa sarki gozal. (VI)
0 comments:
Post a Comment