Novi Delhi: Ghov-bhaile modem ghottasfott vo kuxin sorun vetoleank fuddarak koslich oddchonn zaina zaunk, logna adim aplo dhorm bodlunk sodhtoleamni nitisobhe mukhar nond korchem mhonn Kaidea Aiyog (Law Commission)-an formailam. Toxem kelear jeo addkholleo logn zal'lim doxim zatana uprastat, teo vattaunk sompem zatolem ani khoinchea kaidea khal tem-tem logn nond zal'lem tem polleunchem poddtolem.
Hindu dhormachea poramporik riti pormannem, ek Kristanv cheddum eka Hindu cheddea lagim logn zal'lea karannank lagun, ghottasfotta vellar Keralache Unchle Nitisobhent oddchonn aili. Tea khatir Nitidar P V Reddy-in 235 vako toyar kortana, ti suchnna korchi poddli. Hindu Logna Kaidea pormannem tem cheddum ghottasfott (divors) diunk toyar na zalem karann tem Kristanv aslem ani Hindu kaido taka lagu zainaslo. Novea kaidea pormannem, vegllea dhormachea mon'xam thaim logn zatoleamni aplo dhorm bodolpachi nond eka mhoinea uprant Registrar for Marriages-a mukhar korchi poddtoli. Tea-tea mon'xachem nanv ani pot'to notice board-ar ghalun, konnachi-i oddchonn asa zalear jahir kortole. 21 disam uprant, Registrar tea-tea mon'xak dhorm bodolpachi sertifiket ditoli.
Novo kaido korunk vo adlea kaideam modem bodol haddchi goroz na, oxem Kaidea Aiyog sangta. Aplo dhorm bodoltoleamni registrar thaim apli nanvam nond korchim poddtolim, oxem Kendran soglleam raxttrank ek 'order' pas korchi poddtoli.
To kaido nastona-i, aplea dhorm bodolpachi nond kortoch logn zalear odik borem karann logn uprant dadleak ani bailek koslich oddchonn asunk favona. - VI
0 comments:
Post a Comment