Kristanv mhonnlear konn? Zo monis Kristacho pattlav korta to Kristanv. Dusrea utramni zo monis Jezu Kristache xikvovnne pormannem cholta to Kristanv. Zo monis Jezu Kristan dilole updes pallun aplem jivit jiyeta to Kristanv. Xati fuddem kaddun Kristanv mhunn sangpak ami fattim ravona punn titlech umedin ami Kristachi xikvonn amchea jivitachi dixa keloli zalear khub borem zatolem aslem.
Proxnn: Heach khatir mhoje mukhar ek proxn ubo zata. Ami Kristi ghorabeant zolmoleat, Batizm ghetla, Komunhanv ghetla, Krizm ghetla, Dor Aitara ami Misak vetanv, zaite zann dispott'ttim Mis aikotat, festam-porbô somarombhtat, adi., adi. Oxem asun poriant ami khore Kristanv asanv kai? Hanv hangasor amcheach jivitantlim kaim udharonam ditam.
Udharonnam:1. Amkam amchea ghora kodde thavn Ponnje, Mhapxeam, Moddganv, adi vochunk zai zalear ami 'public transport' mhonnlear bosin provas kortanv. Zaite pavtti zannttim ani duent mon'xam bosint bhitor sortat. Bospak zago asona. Tornatte, tornattim zageancher boslolim astat. Punn kitlim zannam aplea zageavoilim utthun zannttea vo duent mon'xak bosunk aplo zago ditat kai?
2. Aichea kallar rosteancher aksiddent khub vaddleat. Kitlech pavtti aksiddent zaun rosteancher bhurge, zantte, dadle, bailô adi vollvolltat tem ami polletanv. Oslea vellar ami amchem sogllem kam' soddun kitlim zannam aksiddenttak sampoddloleak amcho adar ditanv kai?
3. Goribi nastana khoinchoch somaz na. Bekarponn goribi vaddoita. Xikxonn naslolea karonnank lagun goribi disandis vaddot veta. Mottea vegan (speed) vaddtti amchi loksonkea (population) amchea somazant goribkayek odik okhondd korta. Hakach lagun rosteancher ani ghoram ghoramni bhonvpi bhikari amche nodrek yeta. Rostear aslolea sogllea bhikareank tunvem adar diuncho mhunn hanv mhunnona kiteak tem xok'kea na. Ghoddta tannim ekach bhikareak poriant aplo il'lo adar dilolo zalear kitlem borem zanvchem naslem? Amche modle kitle oxem chintat ani eka tori bhikareak aplo adar dita kai?
4. Ami sogllea dhormik karyavollimni vantto ghetanv. Igorzamni vachpam ani magnnim kortanv. Somudayamni ami fuddakar ghetanv. Ekvottacho, mogacho ani bhavponnacho sondex ditanv. Bhes bori kornni hi. Punn amcheach ghorabeamni ami duspott kortanv. Maim-sunam modem futt, bhav-bhavam bhitor dusmankai, ghov-bailam bhitor zhogddim, adi,. adi. vosta tem ami polletanv. Dusreank sondex diunche adim ami amcheach ghorbeant vostoli futt, dusmankai, zhogddim ani bhed-bhav na korunk proitn kortanv kai?
Niall: Vhoir diloleo amchea jivitantleo fokt charuch ghoddnneo hanvem vachpeanche nodrek haddleat. Disa dispott'ttim ami teo kornneo adhartanv. Anik ek pavtt vachun tacher il'lo niyall korum-ia. Je proxn hanvem thoim manddleat tancho tumi tumkanch zabab diunk proitn korat. Tumcho zabab don' bhitorlo ek astolo: 'Hoi' vo 'Nhoi'. Tumcho zabab 'Hoi' aslo zalear tum Kristanv mhunn jiyeta ani 'Nhoi' mhunn aslear tum Kristanv zaun poriant Kristache xikvonne pormannem jiyena oxem mhaka dista.
Krist hanv: Amche dhormik guru Kristanv hea xobdachem vornnon' kortana oxem mhunnttat, 'Kristanv' mhunnchem 'Krist hanv'. Dusrea utramni Kristanv mhunnlolo prot'tek monis ek Krist. Tea khatir Jezu Kristachea panvlamni cholun jivit sarop hi eka Kristanvachi zababdarich nhoi punn kortovya (duty) zaun asa.
Anik eka dhormgurun Kristanv hea xobdacho orth spoxtt kortana oxem mhunnlem.
"Devan mon'xak chintpa khatir bezo dila, pollevpa khatir dolle dileat, aikupa khatir kan' dileat ani ulovpa khatir jib dilea. Zori ami Kristachea bezean chintanv, zori tor ami Kristachea dolleamni polletanv, zori tor ami Kristachea kanamni aikotanv ani zori ami Kristache jibent uloitanv zalearuch ami khore Kristanv". Hem Kristanv xobdachem vornnon amkam lagu zata kai?
Sompoitana: Aichea kallar amchea somazak fokt Kristavanchi goroz na punn Krista porim aplem jivit sarpi mon'xanchi odikuch goroz asa. Durdoivan (unfortunately) amchea somazant Kristanv khub asat punn Krista porim aplea jivitachim panvlam ghalpi Kristanv mat egdomuch thodde asat. Teach khatir ami sogllim nanvam purtinch Kristanvam asat kai mhunn dubhav poddta. (Courtesy Vauraddeancho Ixtt)
0 comments:
Post a Comment