Moddganv: Bharot desachea ekvotta ani ekchara khatir aplea jivachem boli poddlolea Mahatma Gandhicho khun kelolea mon'xache daiji aiz akantvadi zaleat, oxem Rajeo Sobhecho Khasdar Xri Shantaram Naik-an sanglem.
Moddganv xarant Dokxinn Gõychea Nehru Tornatteam Kendran ghoddun haddlolea Proxikxonn Xibirachi ugtavnni kele uprant to uloitalo. Sov veg-vegllea rajeanche tornnatte proxikxonn ghevpachea xibirak hajir zal'le. Desachea ekchara khatir Mahatma Gandhin, Nehrun, Sardar Patil ani heramni aplea jivitache tyag keleat tancho thambonastana tornatteamni ugddas korunk zai ani je vaitt monache monis dhormanchea nanvan somaza modem futti ghalunk vavurtat tankam sarkhe dakoll korunk zai mhonn Xri Naika-an sanglem.
Desant soglleak akantvad korchea monant te sadhunchem ani sadhvinchem rup gheun bhonvtat, odik bhirantichem mhonnlear surokxon bollantle kaim monis-ui oslea zomeamni asat; ho anik ek akant desa mukhar uprasla mhonnlem. Desant 1,652 bhaso asat, itlo veg-vegllea dhormancho ani zatincho lok Bharotachea 22 rajeamni ani 9 songh pradeshamni jiyeta. Him rajeam ani he songh Pradesh sabar toreche rajki pokx rajkarbhar choloitat. Tori astana desacho ekchar ani ekvott ektthoulolo asa mhonn Xri Shantaram Naikan sanglem. Desant dhormanchea nanvan bhovxik zomati ani lhan lhan boska zaiteoch zatat, toripunn tancho rajki hetu choryam liploloch agenda (hidden agenda) astach mhonn tannem lokx oddlem.- VI
0 comments:
Post a Comment