Ponnje: 18 ani 19 vorsanche pirayechim Gõychim tornattim aplea motdan korpachea hok'ka vixim borich be-zababdar kortat vo he pillge modem zagrutai matui na mhonn disun ailam.
2001 vorsa Gõyant zalele lok-meznnecho (census) riporta pormannem 18 ani 19 vorsanche pirayechea tornatteanchi sonkhea 40 hozar asa. Hantuntlea fokot 16 hozar tornatteamni ap-aplea nanvanchi nondnni motdan vollerint kelea. Urlelim 24 hozar tornatteanchim nanvam te vollerint nant mhonn Gõychea Venchnnuk Aiogak spoxtt zalam.
Halinch Gõychea Venchnnuk Aiogan hea vixim barik toxi khas topasnni keli, tea vellar gomlem ki, 18 ani 19 vorsam pirayechim 40 hozar tornattim Gõyant asat. Punn hea 40 hozarantlim fokot 16 hozar mhonnge 40% tornattim aplim nanvam motdan volleirnt aspavn urlelim 60% motdanachea odhikara vixim zagrut kiteak nant? Hea proxnacho zabab sodun kaddunk Venchnnuk Aiogache odhikari vavrak lagleat.
Venchnnuk vollerint aplim nanvam aspavn ghevpa fattlem karann kitem asum yet? oso ek lhanso proxn hea Aiogantlea odhikareak kelo tea vellar tannem sanglem, tanchea mota pormannem hea fattlim karannam khup torechim asum yetat. Eka nagrikak tache pirayechim 21 vorsam bhorlea xivai venchnnukent zanv ti magir Panchayat, nogorpalika, Zilla Parishad, Vidhan Sobha sarkeamni bhag ghevpak. Hanv mhonninam, punn hem zanv yeta ek karann him tornattim aplim nanvam motdan vollerint nond korpak uxir kortat.
Anik eka odhikarean mahiti dil'lea pormannem, hea 18 ani 19 vorsanchea tornatteamni aplim nanvam motdan vollerint aspavn ghevpa khatir, Venchnnuk Aiogan ek khas zagrutai haddpacho vavr hatant ghetla. Hea vavracho ek mukhel bhag koso, atam meren 18 ani 19 vorsam pirayechim tornattim motdan vollerint aspavlelim asat, tancho yeta tea kaim disam bhitor Gõychem Venchnnuk Aiog sotkar kortolem.
Punn oxe torecho ani vegllech pod'doticho sotkar korpa fattlean khas karann kitem? Hea proxnak zabab ditanam tannem sanglem, Hem korpa fattlo hetu ekuch, hea 16 hozar tornatteancho sotkar zala tem pollevn bakichim urleant tim tornatteam apunn fuddem sorun, motdan vollerint nanv ghalunk yetelim mhonn Aiogak bhorvanso asa.
Gõyant 40 motdarsongh asat. Vidhan Sobhechea chalisui motdarsonghamni 1 hozar 338 'part' asat. Dor eka motdarsonghant 40 te 50 'part' astat. Hea dor eka 'part'-ant 18 ani 19 vorsam pirayechea kitlea tornatteamni, aplem nanv motdan vollerint nond kelam tem gomun yeta. Hi mahiti Gõychea Venchnnuk Aiogan ekttailea mhonn sangtat. Ani he mahiti pormannem 16 hozar tornatteancho sotkar korpak yevjilam.
Hem sogllem korun poryan vhoddloso faido Venchnnuk Aiyogak zatolo oxem disonam. Ani hachem karann mhonnlear, aichea kallar venchnnukancher, ani he toren rajkarbhar cholta tacher, tornattim toxim zannttim sogllinch vitteleant mhonnpachem nodrek yeta. Motdan korpacho ho dor eka nagrikacho noitik, dhormik ani lokxaik odhikar aslo, torui to bhroxttacharachea chiklant boroch buddlolo asa.
Ani hem-i zavn asa ek mukhel karann aiz kal tornattim zanv zanttim motdan korunk fattim sortat, oxem jahir mot aple torfen Moddganvcho ek nagrik Camilo Santano Pereiran sanglem. (VI)
0 comments:
Post a Comment