Hi chitt hanv boroitam ti Goenchea khorea niz suttke-zhuzareank okman korunk nhoi, ponn je apunn suttke-zhuzari mhonntat tankam lagun. Sogllea khorea suttke-zhuzareank ami bhovman kortanv. Kaim fottkire ani lobadd suttke-zhuzari apnnakuch vhoir kaddtat te 60 vorsam poryan khoim asle?
Purtugez nanvam bodlunk zai mhonn sangtat ani sumar 200 ganvamni oslo paddo prochar korunk yevjitat. 1961 vorsa thavn amchea suttke-zhuzari mhonntat tannim Goenchea ani Goenkaram pasot kitem tori kelam zait? Kosle tori Goeant upraslole proxn suttave korunk upay gheunk fuddem sorleat zait? Vo fokot Purtugez nanvancher ani sonvskrutayecher add nare gazounk bhair sorleat. Nanvam bodlop mhonnlear kainch nhoi, nanvam divop vo dileant tim fokot adleamni kel'lea kamancho ugddas dovrunk, to konnachean pusun kaddunk zaina, to ugddas amkam boro lagum vo na lagum to amchea itihasacho bhag. Bharoti chodd lok Hindu aslolean Bharotak lagtolo Muslim ani British itihas kednam tori visrunk zatolo. Novim nanvam diun itihas pusunk zait?
Aiz Goeant chodd korpachem gorjechem kam' asa tem amchem poryavonn ani amchea Goenchem soimbik daiz (ecology) samballunk, bhroxttacharacher, zatim-katincher ani dhormik zogddeancher zhuzunk toxench soglleank xikxonn mellunk, durbollkay poisavunk, bholaikechi polisi zache vorvim dor Goenkarak boreponn mellta toxem korunk, dor ghorak piyeupachem udok, bizli ani dispott'tteo gorjecheo vostu mellunk Hachi choddan chodd goroz. Purtugez nanvam bodlun amche proxn suttave zaunche nant ani amcho dorzoi vaddcho na. Purtugez nanvam khatir amche suttke zhuzari mhonntat te besteo khonti kaddun abzautat; osleam koddlean amkam onek kitem mellunk xekta?
1 comments:
Chorunk mevonaslem tea passot
Post a Comment