Mongllur: Karnatakantlea sabar zageancher igorzo, konvent ani magnneanchea sobhaghorancher 2008 vorsachea Setembrache 14ver thavn sabar hol'le zale. Tachi chovkoxi korunk sorkaran nitidar B. K. Somashekar-ak nemlolo. Tannem halinch aplo vako dilo. To vako Kristanvam add asun tantunt sot na. Ho vako Kristanvam mandhun ghena mhunn dakhounk Mongllurant, Mongllur Katolk fuddariponna khal moneponnim tonddak kallo kuddko ani hatant kale bavtte gheun lamb nixedh pursanv Febrerache 20-ver Jyothi Circle thavn suru zalo ani Mongllurchea Nehru moidanar Kristi lokachi zomat zali.
2008 vorsa Karnatakant Kristanvam add zal'lea akromonnachi chovkoxi CBI-k diunchi mhonn Kristanvamni magnnim keli. "Nit melloun gheunk ami hanga zoma zaleanv. Amcher onit adartoleancher amcho nixed marunk ami hanga aileanv," oxem Bisp Aloysius Paul D'Souza-n sanglem. Dil'lo vako Kristanvamchim bhav'nam dukhoita ani unnea sonkhechea somudhaiek konxeak marta, oxem tannem mhonnlem.
Akromon adim fuddench tharailolem karann tem eka vellar kitleach zageancher ghoddon ailem, oxem Karnataka Missions Network-acho odheokx Walter Maben-an sanglem. Akromon korpi konn ani pulisanchim vankddeponnam Komission-ak khobor asa, oxem tannem mhonnlem.
Ho nixedh morcha Mongllur Katolk dhormpranta vangdda Syro-Malabar dhormprant Belthangady, Syro-Malankara dhormprant-Puttur, Dokxinn Bharotachim Kristanvam (CSI) (Dokxinn Karnataka dhormprant), Malankara Orthodox Syrian, Malankara Syrian Jacobite, Marthoma ani Karnatakantlim Kristanvam ani her Kristi Sobha toxench Kristi Sonvstha ani heramni hea morchant vantto ghetlo.
Xmti. Mariamma Thomas, ek Katolk fuddari, Bradar Walter J. Maben, Karnataka Mission Network-acho odheokx toxench Mongllurcho Katolk Bisp Aloysius Paul D'Souza hanchim ulovpam zalim. Pri. Onil D'Souzan ek nivedon vachun Bisp Aloysius D'Souza-n Xri R. Ramesh pulisechea Deputy Commissioner-ak dilem.
Hea vellar Bisp C. L. Furtado (CSI), Bisp Lawrence Mukkuzhy (Belthangady dhormprant), Bisp Geevargheese Mar Divannasious (Puttur dhormprant), Bisp John Sadadandha, CSI toxench Xri Oscar Fernandes hajir asle. Kryachim sutram L. J. Fernandes, Titus Noronha, George Castelino ani Valerian Moras hannim choloilim. (Courtesy Vauraddeancho Ixtt)
0 comments:
Post a Comment