Mogall somest Goenkarank ani Niz Goenkar Vachpeank: Aum tumche mukhar kaim ghoxtti dovortam Niz Goenkara vixim. Niz Goenkar anven suru kelelm zagrut korunk Goenkarank, karann maka dison ailem koxe porim mojea mogachea Goenchem nisontonn zata tem ani he nisontonn korpi dusre anik konn nhoi bogor amchem rajkarbari.
Hi website anven suru keleki ek khas sopon monant dhorun ani tem mhollear vaur ani seva moje maim bhumiecho Goencho.
NIZ GOENKAR nhoi poixeanche axecho ani nhoi dhan ektaim korpacho, maka hem ugtteponnim tumkam sangom di ani ho mozo saf suf nirop sogllea mojea mogachea Goenkarank. Zankam konnank dista ki Niz Goenkar poixe ektaim korpak suru zala ou poixe ekttaim korpacho ubhar ghetla zalear NAM. Hem sot nhoi ani amkam tumchem konnachech poixe naka punn amkam zai fokot tumcho tenko ani adar Goeant choltolo broxttachar ani vaitt vostu nitoll korunk. Moje motint nam rajnithint rigpachem ou ek pokx ghoddpachem. He mojea vosulam add veta, je vosul aum mandtam ani palltam. Oi ami Goenkar ek zobordost athiar zaunk xekta, hea broxttachareank bhair uddounk ani broxttachar nopoit korunk ani Goem portun borea orkhachea margar addunk.
Niz Goenkarak poixeanchi goroz nam ou dhan ekttaupachi goroz nam. Tor ho ek saf nirop ki amkam tumchea poixeanchi goroz nam ani konnuch Niz Goenkarachea nanvan poixe ekttaim korcho nam. Zor tor tumche laguim konnui ailear Niz Goenkarachea nanvan poixe magonk, tor zanno zait taka anven porvangi diunk nam ou khoincheach mojea sangatean tankam porvangi diunk nam.
Maka montri zaunk naka ani heach passot proxnnuch enam ek pokx ghoddun addpacho ani je meren pokx ghoddpacho nam, to meren dhan ekttaim korpachi gorozuch enam. Punn amcheani jerul tenko diunk zata borea ani nitoll umedvarak voir soronk kainch vankddem korinastana.
Tech porim amcheani zogddonk zara broxttachariam ani broxttachara add Niz Goenkara vorvim. Hea passot tumcheani zaunk zatat vangddi Niz Goenkarache zuzonk ekvottan mojea sangata vaitta goddta Goeant tache add. Khobro ani amcheo ucharnneo zaun assa ek zobordost athiar zaka podvi assa vhoddlo dongor foddun sokol uddounk.
Tor Goenkarano fuddem sorat tumcho avaz bhair ghalat, ogui ravonakat, kiteak ogui ravop mhollear te amchi oskotai sozmotat, goroz zalear rostear eiat nitou korunk ghann ji korun dovorla amchea atanchea rajkarbareani. Punn sogleam von poile zagrut zaiat ani aikat avaz Niz Goenkaracho, zor tor tumkam Goeant bodlop zai zalear. Tor bodlun uddoumia atanchem karbar, zache karbari zaun assa ginean naslele ani xinkop naslele pixe je amchea dolleancher panam bandunk proitn kortat.
Amchi oddchonn zaun assa ki ami Goenkar toiar nam pollounk sot jem cholta tem ugddeponnim, ani ami amche dolle damptaum poristhite mukhar ani rautaum anik dusro konnui tori eun amkam korun ditolo mhunnon. Amkam rajnitint bhitor rigpachi goroz nam sogllem somadan korunk punn amcheani amchea lokxahichea nagriki bolla udexim bodlop korun dakounk zata zorui amchi lokxahi sarkhi nam, ti sudam amcheani suater ghalunk zata. Ami ogui assaum mhunnon nhoi ani naka tosle zome amcho faido kaddta aplea boreponna passot ou aple hetu xevottak pavounk.
Anik ek pautt upkar korun tumche motint gheiat ki Niz Goenkar ani tachea vangddeani dhana passot koslich magnni korunk nam. Zor tor konnench hi magnni kelea Niz Goenkarachea nanvan zalear aum tumcho upkari astolom tumi maka tanchim nanvam ani pot’te pattoun dilear.
Mozo ho lhan lekh sompounchea adim poixeam vixim, aum magtam soglea Goenkaram laguim tannim Niz Goenkar zaunk ani aplo tallo ubharunk zoxe porim Egiptant, Tunisiant adi desani ghoddta te porim, hea adlea bhamtteank bhair uddounk. Hem amchea athani assa favo tem sudarop ghoddun addunk. Ami vauronk zai nitol, ani broxttachar naslelem Goem korunk zantun dhormik bedh bhav nastanam adlea kallar soglea dhormache lok eka mekachea mogan jiele te porim ani hem fokot dhor eka Goenkaran amche khasgi khottle ani vegllochar kuxin dourun ekvottan ravon korunk zata.
