Ponnje: Gõyeant divors ghevpachem promann bhorpur vaddlam. Fattlea eka vorsachea kallant 793 divors kexeo nond zaleo ani 307 kexincho nikal zalo. Dor disa don vo odik divors kexi Gõychea veg-vegllea korttinim nond zatat mhonn sangtat.
Gõyant 2007 vorsa 384 divors nond zaleat. 2008 vorsachea poilea panch mhoineamni Saxtti, Murmuganv sarkea talukeant 129 divors ghevpa vixim kexi nond zaleo. Fattlea tin vorsank divors magpacheo kexi dupott vaddleat mhonn gomlem.
Zannkaranchea mota udexim, tannim hi ek usko korpa sarki gozal mhonn aplem mot porgottlam. Murmuganvcho ek namnecho Advogad Birandra Singh Sangta tea pormannem aiz-kal tornatteam modem bhorpur vaddlam. Niktinch kazar zalelim kitlinch tornattim ek tor ghov baile vinnem vo bail ghova vinnem nokream khatir pordesant vetat.
"Hem oxem zalelea karonnan, him eksurim aslelim dadlo vo bail magir tanche som'bondh her dadle-bailam kodde zulltat. Itlench nhoi, he som'bondh itle vaddtat ki, te som'bondh rakhun dovorpa khatir, tankam divors ghetlea xivai dusri vatt na zata. Ani choddant-chodd oslea keximni hem spoxtt zalam," oxem Adv Singh sangta.
Fattlea tin vorsanchi ankddevari divors kexinchi Ut'tor toxem Dokxinn Gõychi oxe toren asa. Ut'tor Gõyant 2008 vorsa 577 kexi nond zaleo ani 226 kexincho nikal laglo. 2009 vorsant 578 kexi nond zaleo ani 265 kexincho nikal laglo. 2010 vorsa 583 nond zaleo ani 244 kexincho nikal lagla.
Tech porim Dokxinn Gõyant 2008 vorsant 173 kexi nond zaleo ani 66 kexincho nikal laglo. 2009 vorsa soglleam von chodd mhonnge 210 kexeo nond zaleo ani adlea vorsa porim 53 kexincho nikal laglo. Hea itlea sogott divors keximchem gonnit pollelear aiz-kal kazaranchi kosli poristhiti zalea ti polle oxem anik eklo zannkar Xri Costancio Abranches mhonnunk laglo.
Hea vaddtea divorsancheo kexim vixim ani tanchea karannam vixim mahiti ghevpa khatir, Gõycho ek namnecho 'councillor' Xri F.X. Costa kodde bhasabhas kortana tannem sanglem, choddxeo divors-ancheo kexi ontor-dhormanchim kazari zoddpeam (Inter Religion Married Couples) hanche modem zaloleo chodd disun yetat. Ap-aplea fuddara vixim barkayen niyall korinastanam, mellot tachea mogan poddtat. Kazarak ghorcheamni porvangi divnk na zalear, pollun vochon kazar zatat.
Survatek sogllem bore bhaxen hea zoddpeam modem cholta, punn bhov thoddo kall tem togta. Punn uprant tanche eka-mekache achar-vichar, sonvskruti, porampora eka mekak zullnant. Gorje bhair lhan-vhodd karannank lagun kizilam uprastat. Kaim pavtti kizilam itlim marekar zatat ani magir him zoddpim divors ghevpak panvl ubhartat.
Toripunn Gõy sarkea dhakttulea rajeant divors keximchem promann itlem vaddlam tem pollelear hi ek uskeachi gozal. He vixim kazari zoddpeam modem zagrutai nirmann zavnk zai. Khupxea zoddpeank 'kazar' hea utracho sarko orth na. Tankam to orth divpacho aiz vell aila, oxem F. X. Costan sanglem.
0 comments:
Post a Comment