Ponnje: Bhroxttachar, banngoddeo, fosovnneom, 'black mailing', hafto ghevop,vikallea vokhdanchi vikri, zuttier astana ostoreancher agllik ani bollzabri korop hea sarkea sabar guneanvam khal, fattlea 30 mhoineam modem Gõychea pulis khateantle 55 odhikareank 'suspend' keleat mhonn gomlam.
He gozalicher niyall kelo tednam dor 15 tem 16 disank ek tori pulis odhikari 'suspend' zata. 2008 Junh tem 2010 vorsacho Dezembr meren Gõychea pulis khatea viximchi kelea ti gozal 100% sot mhonnum yeta. Je 55 pulis odhikari 'suspend' zaleat, tantlea 38 zannancher nitisobhen arop potram dakholl keleant. 2008 vorsa 6 zann, 2009 vorsa 21 zann tor 2010 vorsa 18 pulis odhikareank 'suspend' korun tancher nitisobhen kaidea pormannem, tea-tea kolma khal kexeo manddleat mhonn pulis khateantlean gomun ailam.
Je-je pulis odhikari 'suspend' zaleat, tantunt, pulis odhikari soreachea noxan vahan choloitanam sampoddlo. Tacher karvay zavn taka 'suspend' kelo. Teach vorsa anik eka pulisan fottkire dukument dakholl korun vahan cholovpeachi nokri melloileli, tacherui koddok karvay korun taka nokrevelo kaddlo. Toxench eka mogan aslolea zoddpea kodde eklo Dysp Valpoi ganvant tankam 'black mail' korun tanche koddlean lonch ghevpache proitn kortalo. Tacher poryan karvay korun taka-i suspend kelo, oxem to odhikari sangta.
Ho pulis odhikari fuddem sangta tea pormannem, Gõy- Maharaxttr ximer aslolea Patradevi ani Nayabag hanga aslolea 'check posts'-ancher bhorpur bhroxttachar cholta mhonn pulisechea unchlea odhikareank gomlem ani haka lagun Peddneche pulis chovkevelo eklo unchlo pulis odhikari 'suspend; zalo. Hech pulis chovke velo ek hawaldar hafto ghetanam sampoddlolean taka 'suspend' kelo.
Setembr 2009 vorsa eka pulis hawaldaran Moddganv hangachea relve sthanar 1 lakh 70 hozar rupyanchi chori kelea mhonn gomun ail'lem. Tea uprant tacher chovkoxi zavn ti chori sidh zalea uprant taka nokre velo kaddun uddoilo. Heach vorsa Bardezant ek pulis odhikari, pulisechea vahanant eke ostorecher bollzabri kortanam, dusrea eka pulisan 'mobile camera' udexim tachem film kelem ani pulisechea vhoddilank dakhoilem. Tacher koddok chovkoxi zavn hea pulisak somto kaddlo.
Vikhallim vokhdam ani xindullke prokronnant poddlole halinchea kallar khupxe lhan toxe unchle pulis odhikari 'suspend' zaleat ani khupxe zavpache-i vatter asat mhonn khobor gomlea. Pulis khateantlea kaim bhroxttachari odhikareamni, hea khateachem nanv sarkench ibaddun uddoilam. Eka kallar hea khateak aslolem nanv, dorzo ani pulisechi bhirant dispott'ttim nopoit zait veta. Pulis khatem aiz-kal guneanvanchem bhuim-voikuntt zalam. Khoincheach pulis odhikareacher aiz visvas dovrunk moskil zata. Adlea kallar oxem zainaslem mhonn mhonn pulis seventlean nivrut zalolo ek unchlo odhikari uloitana sangunk laglo. Kaideachi rakhonn korpi rakhondar jedna kaido moddtat, tednam sadea mon'xan konna sorxim vechem? oxem to mhonnta. (Courtesy Vauraddeancho Ixtt)
1 comments:
Vaitt kelear vaitt meuta. Zo konn tolvaren zuzta to tolvarenuch morta hi zaun assa adleanchi mun'ni. Pulisani aplem naum pirder korun soddlam. Sogle lobadd ani chor bhorleat pulis khateant.
Post a Comment