Novi Delhi : Jedna Kristi fuddareamni ani hok'kanchea zomeamni aplo usko ugtailo tednam, Janerache 25-ver Suprim Nitisobhen konversanvancher aplem mot fattim ghetlam. Graham Staines hea misionarachea khuna vixim Janerache 21ver Suprim Kortin aplem mot ditana, dhormik konversanvam korpachi kamam kortalo mhonn taka jivexim marlo oxem Suprim Nitisobhen sanglolem. Atam tim utram "unconstitutional" aslolean Nitisobhen kaddun uddoilim mhonn Suprim Nitisobhent vavurtoli Sistor Mary Scaria-an sanglem.
Nitisobhechea nivaddeantlim tim utram kaddtoch, to nivaddo oxem sangta: Orissa rajeantlea Manoharpur ganvant thamboil'le gaddiyent nhidlole astona, Staines-ak ani tachea dogam putank lasoun marle. Adivasi lokak Kristanv korpache karyavolli choloitale dekhun, tankam budh xikounk toxem kelem. Ho bodol Unchle Nitisobhen mandun ghetla ani mornnache khasti bodlel khuneak jivitbhor bondkhonn diunk tharailam.
Taka lagun ak'khea desant motto usko zala. Aplo dhorm porgottunk nitisobhen ghottnechi beporva kelea mhonn Orisantlo somaz vavurpi Mahendra Paridan sangta. 1999 vorsa Orisant Australian misionarak jivexim marlo dekhun opradheak mornnachi khast formatana, nitisobhen tem mot jahir kel'lem.
Ravindrapal Singh-an lokak fusllaun, Staines ani tachea dogam dhaktteam putank jivexim marunk fuddakar ghetlolean nitisobhen taka-i mornnachi khast favo kel'li. Bharotachea kaidea pormannem mornnachi khast fokt thoddeankuch favo zata. Staines adivasi lokak Kristanv kortalo mhonn tachem vingans gheunk Ravindrapal-an tancho khun kel'lo. (VI)
2 comments:
Hem sogllem goddta vankddea sonsthank lagun. RSS, Bajrang Dal and VHP ankam sorkaran poile nopoit korunk zai zalearuch soglem sarkem zatelem
RSS, Bajrang Dal ani VHP zaun assa zonvaram. Tankam borem korpachem kainch poddonk nam. Boream munxeani osleank laguim dhorunk zaina.
Post a Comment