Amche somzonne pormannem suttke zhuzari mhonnlear je aplea rajyache suttke khatir zhuzleat vo zulumxay choloitoleanchem raj nopoit korunk vavurleat. Bharotache suttke zhuzari toxench Goyche suttke zhuzari mhunn zaitea zannanchim nanvam nond zaleant. Halinch Goychea sorkaran novea 16 zannanchim nanvam Goychea suttke zhuzareanche vollerint nond korun jahir keleant. Junachea 18 Goyche Kranti disa, Azad Moidanacher, hea suttke zhuzareancho Mukhel Montri bhovman kortolo.
Suttke zhuzaream vixim koslea na koslea karonnak lagun khobram potrancher khobro uzvaddail'leo amkam melltat. Thoddech dis zale, Goychea sorkaran Medium of Instruction-a (MoI) ghetlolo nirnnoi bodlunk suttke zhuzareamni aplo tallo ubarla. Goychea sorkarak Junachi 18 tarikh deadline koxi dovrun, thodde suttke zhuzareamni Goychea Kranti disachea suvalleacher bohixkar (boycott) ghalun sorkarak dhomki dilea.
Goyant atam somaz seva ani Goychi rakhonn korunk andolan chalu asa. Tantuntle thodde zann oso proxn kortat. Gُyche suttke zhuzari, Goychi luttmar zata tea vellar aplo tallo kiteak ubarinant. Khoinchea suttke zhuzarean Goyant choltolea poryavoronnachea vaittacher vo minank lagun Goychea srixtticho ibadd zata tacher add bob kele?
He Suttke Zhuzari Kosle? Faido polleun kaido bodoltat. Hakach lagun he kosle suttke zhuzari kai mhunn amche modem proxn uprastat. Konn tankam nanvanche suttke zhuzari mhonntat, zalear konn tankam sorkarache duddu melltolean te sorkara add ulounk fattim sorta mhonntat.
Suttke khatir zhuzta toch khoro suttke zhuzari. Suttka nhoich fokot gulamponnantli, punn soglle torechea bhroxttacharantli. Bhroxttachara add Bharotant ji chollvoll suru zalea ti yesvont zait zalear Bharotacho fuddar anink novsorun porzolltolo.
Monis aplea adlea jivitant aslolem vaitt lipounk sodta ani atam jem kitem korta tachi khobor dusreache nodre add dovorta, toxench fuddarak kitem korcho asa tem-i to guptim samballta. Punn jedna hoch monis somazache sevecho odhikari asa zalear heach somaza mukhar aplea odhikara vorvim tannem kitem kelem vo korta ani korchem asa tem kiteak lipounk sodta? Osli suttka amkam Lokpal Bill ditolem. Punn Sorkar tachem boll toddunk lagla.
Bharotant toxench Goyant koslea suttke zhuzareanchi goroz asa? Nhoi zanchi nond zalea ani puroskar mell'leat vo dor mhoineak sorkarachem pensanv eta. He Goyche nove suttke pasot addkolleo haddtole kiteak tanche hok'k somptole. Tanche add proxn vaddttole ani sorkar tankam ani tanche pinddkek duddvancho adar favo korunk zai to proxn vaddttolo.
Raj choloitolo sorkar kednach suttke zhuzareank mandun ghena. Dekhunuch Portugez toxem British sorkaramni tankam tras dile. Tech porim aiz-ui amchea somazant amcho-i sorkar konn bhroxttachara add zhuzta vo konn sorkarachea vankddea kaidea add zhuzta tache thaim tosoch vagta. Toch khoro suttke zhuzari. To martir morta tanche familink sorkar pensanv kiteak dina?
Suttke zhuzareank sorkara koddlean duddu melltolean sorkara add ulounk tanchean zhuz mandunk zaina. Punn atam Goyche suttke zhuzareanche chollvollecho nikal kitem zata to polleum-ia. Punn fokot MoI hea vixoyacher te kiteak zogoddtat? Goyant anik kitlech vixoy asat tanche add te khorayen nixed kiteak marinant? Hea proxnacho zobab melltoch nond kel'lea suttke zhuzareanchi topasnni zatoli.
3 comments:
He soglle fotkire suttke zuzari ani fokot vavurtat aplim pottam borunk. He fotkire suttke zuzari zaun asa eka kallavele chor ani lobadd zoxe porim Nagexe Cormoli. Ho eok BHONGI ani Narl chorpi, taka chukon Purtugezani dhorun velo ani to atam apunn suttke zuzari mhunnon nachta.
Sarken tujem Joe, He soglle vodle chor, dorlea uprant Jai Hind mhuntaleat dekum tankan Indian serkaran Suttke Zuzari mhuleat.
Felicio Cardoz amkam konkanni xikoitanam sodannch hea sutke zuzari =nal'lanchea choramchi udharonnan ditalo, ani xevottak hoch nirop dhiun babdo somplo. To vortoulo khoro sutke zuzari, babdeak kazar zaunk legit mel'lenam.
Post a Comment